Израиль әскері Газадағы мектепке шабуыл жасады

Израиль әуе күштері Газа секторының солтүстігінде шабуыл жасап, мектеп ғимаратын талқандады.

Соққыдан 16 палестиналық қаза тауып, 21-і жараланған. Мектепте шабуыл кезінде мүмкіндігі шектеулі адамдар орналасқан екен. Палестинаның азаматтық қорғаныс мекемесі Газа секторында жедел жәрдем және өрт сөндіру көліктері үшін жанармайдың таусылып жатқанын хабарлады.

Таяу Шығыстағы қарулы қақтығыстың созылып жатқанынан 10 айға жуықтады. Осы уақыт аралығында қаза тапқан палестиналықтар саны 39 мың 550-ге жетті.

Рами Дабабиш, азаматтық қорғаныс қызметкері:

- Хамама мектебіне 2 рет әуе шабуылы жасалды. Басқыншы күштер екінші рет әуе соққысы болатынын тұрғындардың біріне қоңырау шалып ескерткен. Сосын біз бәріміз ол жерден кетуге мәжбүр болдық. Айтқандай, екінші рет шабуыл жасалып, құрбандар саны 2 есе өсті.