Бұл туралы елдің Ішкі істер министрі Сулейман Сойлу мәлімдеді. Бұдан былай елдің әрбір шағынауданында шетелдіктердің саны жергілікті тұрғындардың жалпы санынан 20%-тен аспайды, деп хабарлайды «Хабар 24». Бұған дейін бұл көрсеткіш 25% болған. Ал, 1200 шағынаудан тіптен шеттен келгендер үшін түбегейлі жабылады. Түркияда шамамен 4 миллионға жуық шетелдік өмір сүреді. Әсіресе, бұл көрсеткіш пандемия кезінде едәуір өскен. Сулейман Сойлу, Түркияның Ішкі істер министрі: - Түркияның белгілі бір аймақтарында шетелдік азаматтардың шоғырлануының алдын-алу мақсатында бірқатар шаралар қабылданған. Жергілікті тұрғындардан шетелдіктердің саны 25% асып кеткен 54 провинциядағы 781 шағын ауданды өзге елдің азаматтарына уақытша және тұрақты тұруға жапқан едік. 2022 жылдың 1 шілдесінен бастап, 25% квотаны 20%-ке азайттық. Ал 1200 шағын ауданда шетелдік азаматтардың тұруына рұқсат жоқ. Шетел азаматтарының Түкияда тұруына ықтиярхат квотасы алғаш рет ақпан айында енгізілген болатын. Жергілікті ақпарат құралдарының хабарлауынша, мұндай шешім негізінен Дамаскіден қашқан сириялық босқындар ағынының артуына байланысты қабылданған. Ішкі істер министрінің айтуынша, заңсыз көші-қонға қарсы күрес қарқынды жүргізіліп жатыр.