Алматыда ТМД елдерінің V жастар театры форумы басталды

Алматыда ТМД елдерінің бесінші жастар театры форумы басталды, деп хабарлайды 24kz.

Халықаралық мәдени шара режиссура, драматургия, сценография жəне театр саласындағы дарынды жастарды  біріктіреді. Осылайша, мəдениет жəне өнер саласындағы шығармашылық жандардың тәжірибе алмасуына ықпал етеді. Шетелден келген режиссерлер мен драматургтер, кəсіби театр мамандары шеберлік дәрісін өткізеді. Форум аясында 9 мемлекеттен жас режиссерлердің қойылымдары көрсетіледі. Кəсіби қазылар алқасы жеңімпаздарды анықтайды. Үздік деп танылған ұжымға ақшалай сыйлық беріледі. Байқау нәтижелері 9 маусымда белгілі болады.

Тұңғышбай Жаманқұлов, Қазақстан театр қайраткерлері одағының төрағасы:

- Жастарымыз ізденісті жақсы көреді. Солардың біразы Мәскеуге, Арменияға барып, басқа жаққа барып, мастер-кластар өткізіп, өзге елдердің театр қайраткерлері 35 жастағы жастары қандай тәсілмен, қандай жолмен көрермен жүрегіне жол табудың неше түрлі әдістетін үйреніп келген. Бұл шараның маңызы өте зор. Шығармашылықта шек болмайды. Бірақ адам қиялы ерекше. Шығармашылық қиял ерекше.