Орал-Атырау тас жолы жөнделеді
Орал - Атырау бағытындағы республикалық автожолды жөндеуге жобалық-сметалық құжат дайындалып жатыр.
Бұл туралы «Қазавтожол» ұлттық компаниясының маманы мәлімдеді. Келісім-шарт мерзімі 26 айға жасалған. Алайда тапсырыс беруші ұйым жобалаушы кәсіпорыннан тиісті жұмыстарды уақытынан бұрын аяқтауды сұрады. Күре жолдың бойында көлік апаты жиі тіркеледі. Сондықтан жаңғырту жобасы аясында трассаға қосымша 2 жолақ салынады. Қарама-қарсы жолақтар арасын қоршаумен бөлу жоспарланған. Сондай-ақ мал өтетін жерасты өткелдері болады.
Әмір Кәрімбаев, "Қазавтожол" ҰК" АҚ БҚО филиалының директоры:
- Орал-Атырау трассасының БҚО-дағы бөлігі 303 шақырым. Біз сол жолды жөндеуді көздеп отырмыз. 8 учаскеге бөлінеді. Оның біреуі Орал қаласының оңтүстік-батысындағы айналма жол. Жобалау жұмыстарын мерзімінен бұрын аяқтап, негізгі жұмыстарға көшу жоспарда.