Атырау облысында бау-бақшаға қажет жер телімі тегін беріледі

Атырау облысындағы Қызылқоға аудандық әкімдігі тұрғындарға уақытша пайдалану үшін тегін жер телімдерін бере бастады, деп хабарлайды «Хабар 24».

Бұл тәжірибе былтыр бір окргуте қолға алынған еді. Нәтижесінде ауыл тұрғындары 108 тонна картоп, 132 тонна көкөніс және 137 тонна бау-бақша өнімдерін жинап алды. Биыл Ойыл өзенінің тасуына орай аудандағы округтердің барлығы егін егуді жаппай қолға алып жатыр. Оларға 50 гектар жер телімі бөлінді. Қосымша тағы 65 гектар алқап, осы істі қолғауға ниетті жандарға, уақытша тегін пайдалануға берілмек.

Ержан Тұрланұлы, аудандық ауылшаруашылығы және жер қатынастары бөлімінің басшысы:

- Әкімдік тарапынан аталған жерді жыртуға арнайы техника бөлеміз. Сосын сол округтің балансындағы мотопомпалар қойылады. Қарауыл болады. Қазіргі уақытта Миялы округі бойынша 22 адам шығып тұр. Жер жырту жұмыстарын жақын арада бастаймыз. Мамырдың 15-іне егеміз деп жоспарлап отырмыз.