Екібастұзда жылыту маусымы тура бір ай бұрын басталды

Қазір кеншілер шаһарындағы көпқабатты үйлер мен жекеменшік тұрғын үй секторы  жылумен толық қамтылған.

Бірақ кейбір үйдің тұрғындары жылу көрсеткіштеріне шағымданып жатыр. Жиырма шақты көпқабатты үйдің жағдайы күрделі. Ал әкімдік өкілдері «Екібастұз жылуэнерго» орталығында 5 қазандық тұрақты жұмыс істеп тұрғанын жеткізді.

Борангүл Мұфтақова төрт жыл бұрын жаңа үйден пәтер алып қуанышқа кенелген еді. Бірақ баспанасы сапасыз болып шықты. Жылу болған күннің өзінде жылытқыш құралды қоспай болмайды. 

Борангүл Мұфтақова, қала тұрғыны:

- Міне қазанның бірінен бастап жылу берілген, бірақ бізде жылу жоқ. Осы бір комнатада отырамыз осылай. Міне сұп-суық. Батареялар бәрі суық.

Жергілікті әкімдік өкілдерінің айтуынша қазір көпқабатты 20 үйде осындай жағдай қалыптасып отыр. Тұрғындардың шағымы тіркеліп, әр үй бойынша жеке комиссия құрылды

Әнуарбек Аманов, қала әкімінің орынбасары:

- Қазіргі уақытта жылу станциясында бес қазандық істеп тұр. Шығу температурасы 73 градус, обраткасы 51 градус. Қазіргі уақытта Екібастұз қаласында жиырма шақты үйде проблемалар болды. Ол үйлерді зерттеп комиссиямен тексеріп шешім қабылдадық.

Әнуарбек Амановтың айтуынша мәселенің 80 пайызы шешімін тапты. Бұл іске тұрғындар мен қатар пәтер иелері кооперативі де атсалысуы керек.  Еске сала кетейік Екібастұзда жылыту маусымына дайындық жаз бойы жүргізілді. Өткен қыстағы коммуналдық апаттан кейін жылу электр орталығыдағы қазандықтар жөндеуден өтті. Қолданыстағы 400 шақырым жылу желісінің  74 шақырымы ауыстырылды. Қазір қаладағы көпқабатты 690 және 5 мың 700  жер үйге жылу толық барып тұр. 

Авторлары: Қарлығаш Қасиетова, Марат Игіліков