Павлодарда тоғызыншы қабаттан құлаған әйел тірі қалды
Оқиғаның мән-жайы анықталуда, деп хабарлайды Рavlodarnews.kz.
Облыстық ТЖД баспасөз қызметінің мәліметінше, 11 мамырда сағат 14.37-де «112» пультіне Ак. Бектұров көшесі, 109 мекенжайынан хабарлама түскен.
- Тоғыз қабатты тұрғын үйде тоғызыншы қабаттағы пәтердің терезесінен үйге жапсарлас салынған «Экстрамед» медициналық орталығының төбесіне 1993 жылы туған әйел құлаған. Зардап шеккен адам ауруханаға жатқызылды, - деді департаментте.
Оқиға орнына бес құтқарушы мен бір техника шықты.
Облыстық денсаулық сақтау басқармасының мәліметі бойынша, әйелдің жасы 30-да.
Кеуде омыртқасының сынуы, бас миының шайқаулы диагнозымен №1 қалалық ауруханаға жеткізілген.
Естеріңізе сала кетейік, 9 мамыр күні сағат 02:50-де Павлов көшесіндегі үйдің жанында сыртқы зорлық-зомбылық белгілері жоқ тұрғынның денесі табылған. 84 жастағы ер адам төртінші қабатта орналасқан өз пәтерінің терезесінен құлап түскен.