Павлодарда саяжайлар өртеніп жатыр

Тілсіз жаудан 500-ге тарта бағбаншылық шаруашылығы күлге айналды, деп хабарлайды «Хабар 24».

Қалалық ТЖ басқармасының мәліметіне сүйенсек, бір айда 5 ірі өрт тіркелген. Мәселен, «Металлург» саяжайында қызыл жалын 300 бау-бақшаны шарпыды. Оның 90-ы – қолданыстағы жер телімдері. Алдын-ала болжам бойынша, өрттің шығуына адамдардың салғырттығы себеп болған.

Тағы бір оқиға «Яблонька» саяжайында тіркелді. Онда 100-ден аса бағбаншылық аумағы отқа оранды. Қолайсыз ауа райы жағдайды ушықтыра түскен. Оның үстіне саяжай шаруашылықтары әлі сумен толық қамтылған  жоқ. 

Арман Арын, Павлодар қаласы Төтенше жағдайлар басқармасының  бас маманы:

- Соңғы өрт бізде «Металлург» бау-бақшасында болған. Өрттің себебі – ол қоқысты және құрғақ шөпті жағу кезінде өрт қауіпсіздігі ережелерінің бұзылуы. Осы факт бойынша бізде кінәлі адам ұсталды және де осы адам ҚР әкімшілік құқық бұзушылық кодексінің 336-бабы бойынша жауапкершілікке тартылды.