433,56 492.25 5.92
+7 (7172) 757 485 24kz@khabar.kz

Нұрлан Нығматулин Тұңғыш Президент күніне арналған парламенттік конференцияны ашты

  • 85
  • UPD: 12:31, 22.11.2021
Нұрлан Нығматулин Тұңғыш Президент күніне арналған парламенттік конференцияны ашты parlam.kz

Мәжіліс Төрағасы Нұрлан Нығматулин Тұңғыш Президент күніне арналған «Елбасы. Тәуелсіздік. Парламент» атты халықаралық конференцияда сөз сөйлеп, Қазақстанның Тұңғыш Президенті, Елбасы Нұрсұлтан Назарбаевтың стратегиясының арқасында Қазақстан айтарлықтай нәтижелерге қол жеткізгенін атап өтті.

Қазақстан Республикасының Тұңғыш Президенті күніне арналған Конференция биыл еліміздің Тәуелсіздігінің 30 жылдығы аясында өтуде. Парламент Мәжілісі жыл сайын дәстүрлі түрде Тұңғыш Президент күніне орай ұйымдастыратын форумға Әзірбайжан, Түркия, Өзбекстан, Ресей, Словакия, Еуропалық Парламент, ТүркПА парламенттерінің басшылары мен депутаттары, Мәжіліс және Сенат депутаттары, мемлекеттік органдардың, үкіметтік емес ұйымдардың өкілдері мен сарапшылар қауымдастығы қатысты. Конференцияны алғысөзбен ашқан Мәжіліс Төрағасы бірнеше күннен кейін тәуелсіз Қазақстанның құрылғанына 30 жыл толатынын,  бұл тағы бір тарихи белес екенін, еліміз бағындырған әрбір жеңіс, тікелей Елбасының атымен байланысты екенін атап өтті. Сонымен қатар, Палата Спикері Тұңғыш Президентіміздің «алдымен экономика, одан кейін саясат», – деген ұстанымының арқасында еліміз қиындықтарды жеңіп, осы кезеңде қос Палаталы кәсіби Парламент Елбасының және Президенттің  заңнамалық тірегі болғанын айтты.

- Биыл ел тәуелсіздігінің 30 жылдығымен қатар, Қазақстан Парламентінің құрылғанына да 25 жыл толды. Парламент осы 30 жылдың ішінде, Елбасымыз Нұрсұлтан Әбішұлы Назарбаевтың маңызды бастамаларын заң деңгейінде қолдап, барлық реформаларды қажетті, сапалы заңдармен қамтамасыз етті. Бұл жұмыс қазіргі уақытта Мемлекет Басшысы Қасым-Жомарт Тоқаевтың алған қойған міндеттерін орындау мақсатында тиімді жалғасып келеді. Бүгінде Парламенттен шыққан әрбір құжат халқымыздың, еліміздің экономикалық, әлеуметтік, саяси, мәдени дамуының заңнамалық тірегіне айналды деуге болады, - деді Мәжіліс Төрағасы. 

Нұрлан Нығматулин бүгінде Конституциялық реформа нәтижесінде Парламенттің өкілеттігі күшейтілгенін атап өтіп, өткен жылы Мемлекет басшысының бастамасымен Парламенттік оппозиция институты енгізіліп, саяси бәсекелестікті күшейту үшін «Саяси партиялар туралы»,«Сайлау туралы», «Парламент және оның депутаттарының мәртебесі туралы» заңдарға тиісті өзгерістер енгізілгенін атап өтті.  

- Осының барлығы заң шығару қызметіне жаңа серпін беріп, кәсіби Парламенттің беделін арттырды. Қазіргі уақытта біздің заң шығарушы орган барлық әріптес мемлекеттердің парламенттерімен тығыз қарым-қатынас орнатып, халықаралық ұйымдармен тұрақты байланыс жасап келеді, - деді Палата Төрағасы.

Сондай-ақ, Нұрсұлтан Назарбаев Президенттен билік өкілеттіктерін Парламентке және Үкіметке қайта бөлуді көздейтін конституциялық реформа жүргізу туралы бастама көтергенін атап өткен Палата Спикері осы реформаға Тұңғыш Президент бастамашы болып, жалпыхалықтық талқылауға түскенін айтты. Мәжіліс Төрағасы атап өткендей, осы арқылы Елбасымыз ел үшін тағдырлы мәселелерді шешуде әрқашан өз халқының пікіріне сүйенетінін тағы да көрсетті. Осы ретте, Нұрсұлтан Назарбаев елдің басшысы және барлық демократиялық өзгерістердің басты бастамашысы бола отырып, заманауи қазақстандық парламентаризмнің авторы және негізін қалаушы болғанын атап өтті Палата Спикері.

Нұрлан Нығматулин Парламент  халықаралық қоғамдастықта ерекше орны бар барлық халықаралық және өңірлік парламенттік құрылымдардың белсенді қатысушысы екенін алға тартып, қазақстандық депутаттар делегациясы Парламентаралық одақ, ТМД ПАА, ЕҚЫҰ және Еуропа Кеңесі Парламенттік ассамблеялары, ҰҚШҰ және НАТО, Ислам Ынтымақтастығы Ұйымының Парламенттік Одағы, Азия Парламенттік Ассамблеясы, ТүркПА сияқты белді халықаралық ұйымдар қызметіне белсенді қатысатынына тоқталды. Отырыста Мәжіліс Төрағасы  келе жатқан Тұңғыш Президент күні  мерекесімен және Қазақстан Тәуелсіздігінің 30 жылдық мерейтойымен құттықтап: -Біз осы жетістіктермен тоқтамаймыз. Біздің басты бағытымыз – «Қазақстан - 2050» даму Стратегиясы. Елбасымыздың дана саясатының, халқымыздың береке-бірлігінің арқасында ол мақсатқа да абыроймен жетеміз деп сенеміз – деді.

Мәжілістің Баспасөз қызметі

Хабар 24 телеарнасы