БҰҰ еліміздің Абай облысына қатысты қарар қабылдады
Біріккен Ұлттар Ұйымы Бас Ассамблеясының 77-сессиясында бұрынғы Семей өңірі, қазіргі Абай облысын оңалту туралы қарар қабылданды.
Бұл халықаралық ұйымның 1997 жылдан бері осы аймақ халқына қолдау көрсету мен қоршаған ортаны қалпына келтіруге арналған 11-резолюциясы. Ұйым халықаралық қауымдастықты осы мақсаттағы арнайы бағдарламалар мен жобаларды әзірлеу мен жүзеге асыруда Қазақстанға көмек беруге шақырады. Өңірдің тұрақты экономикалық дамуын қамтамасыз етуге үндейді. Құжатта әлем елдерінің аймақтағы ахуалдан хабардар болып отыруына мән беру керектігі жазылған.
Бауыржан Керімқұлов, ҚР-ның БҰҰ жанындағы тұрақты өкілдігінің кеңесшісі:
- Қарарды Біріккен Ұлттар Ұйымына мүше 85 ел бірлесіп әзірледі. Бұл халықаралық қауымдастықтың ядролық сынақтардан жапа шеккен бұрынғы Семей өңірі халқының, әсіресе ондағы балалар мен басқа да осал топтардың денсаулығы үшін алаңдайтынын көрсетеді. Құжатта Қазақстан Үкіметінің аймақты қалпына келтірудегі маңызды ролі айтылып, әлем елдерін осы бағытта қолға алынып жатқан іс-шараларға атсалысуға шақырады.