Қ.Тоқаев: Қазақстан мен Мажарстанның нәтижелі ынтымақтастықты дамытуда әлеуеті зор

Тарихы тамырлас, ағайыны бауырлас қазақ-мажар байланысынан көкжиегі кең келісімдер күтіледі. Мемлекеттік сапармен барған Қасым-Жомарт Тоқаевты Будапешт бар сән-салтанатымен күтіп жатыр, деп хабарлайды 24kz.

Ресми рәсімдердің алғашқы легі аяқталды. Алда Премьер-министр Виктор Орбанмен кездесу және бірқатар бизнесмендермен келіссөз болады деп жоспарланған. Бауырлас елге жасалған сапар қалай өтіп жатыр?

Риат Шони, тілші:

- Қазақстан мен Мажарстан арасындағы қарым-қатынас – тарихтан тамыр тартқан бауырластыққа негізделген өзара сенім мен серіктестіктің жарқын үлгісі. Экономикалық ынтымақтастықта «ортақ мақсатқа қол жеткізу» қағидаты жетекші орын алады. Қазақстан – Мажарстан үшін Орталық Азиядағы сенімді серіктес, ал Мажарстан Еуропаға ашылған терезе іспетті. Сауда-саттық пен инвестициялық жобаларда екі елдің тығыз әріптестігі «бір жеңнен қол, бір жағадан бас шығару» ұстанымын айқын көрсетеді. Қазақтың «Ынтымақ – ырыс қазығы» деген дана сөзі Қазақстан мен Мажарстан арасындағы қарым-қатынастың терең мәнін айшықтай түседі. Екі ел арасындағы осы байланыстар алдағы уақытта да өз жемісін беріп, жаңа белестерге жетелей бермек.

Мажарстан. Еуропаның қақ ортасында орналасқан мемлекет. Стратегиялық маңызға ие. Біз үшін бауырлас халық. Осы бауырластық қатынасты нығайту мақсатында мемлекеттік сапармен келген қазақ басшысын Мажарстанның премьер-министрі Виктор Орбан құрметпен қарсы алды.

Ең әуелі Қазақстан Президентін ресми қарсы алу рәсімі Король сарайының Арыстандар алаңында өтті. Бұл тарихи орын. Король сарайы өткен ғасырларда Мажарстан монархиясының билік орталығы болған. Тарихты құрметтеу мақсатында осындай рәсімдерді бұл алаңда өткізу міндеттеледі.

Ал, бұл – Будапешттегі Шандор сарайы. Мұнда Қасым-Жомарт Тоқаевты Мажарстан Президенті Тамаш Шуйок қарсы алды. Әңгімелесу барысында қазақ басшысы бауырлас қос халық арасында тығыз саяси диалог, нәтижелі экономикалық серіктестік байланыстар жақсы жолға қойылғанын атап өтті.

Қасым-Жомарт Тоқаев, Қазақстан Республикасының Президенті:

- Қазақстан мен Мажарстан ортақ тарих пен мәдениетке арқа сүйей отырып, екіжақты берік байланыс орнатты. Еуропадағы алғашқы елшілігіміз осыдан 30 жыл бұрын Будапешт қаласында ашылған болатын. Екі елдің нәтижелі ынтымақтастықты дамытуда зор әлеуеті бар. Мажарстан Қазақстанның тәуелсіздігін алғашқылардың бірі болып мойындады. Мұны ерекше атап өту керек. Менің осы сапарым көпқырлы ықпалдастықты одан әрі тереңдетуге Қазақстан мен Мажарстанның ниетті екенін көрсетеді.

Өз кезегінде мажар басшысы екі елдер географиялық тұрғыдан алшақ жатқанына қарамастан, қос халықтың тарихы мен мүдессі ортақ екенін жеткізді.

Тамаш Шуйок, Мажарстан Президенті:

- Ұлы Жібек жолының бойында орналасқан Қазақстан – бүгінде Орталық Азияда экономикалық даму тұрғысынан жетекші ел. Сіздің еліңіз үшін халықтар арасындағы достық пен ынтымақтастықты сақтау – маңызды басымдық. Қазақстан бейбітшілік пен тұрақтылыққа зор үлес қосып келеді. Бүгінде елдеріміз көпқырлы ынтымақтастықты нығайтуға және тұрақты байланыстарды ілгерілетуге күш салып отыр. Біздің мәдени қарым-қатынасымыз ғасырлардан тамыр тартады. Мажарлар қазақтардың тұрмыс-салтымен жақсы таныс. Алматы қаласының атауы біздің ана тілімізде әуезді естіледі. Өйткені халқымыз алманы «алма» деп айтады.

Кездесу барысында тараптар екі елдің мәдени-гуманитарлық байланыстарын күшейтуге де мән берді. Әсіресе, жетекші университеттер арасындағы байланыстарды жандандырып, қос халықтың тарихи тамырластығын терең зерттеу керектігі айтылды. Кездесу соңында Қасым-Жомарт Тоқаев құрметті қонақтар кітабына естелік жазба қалдырды.

Авторлары: Риат Шони, Марат Диханбаев, Ділмұрад Сейдаханов, ПТРК