USD 446.33
EUR 485.56
RUB 5.04
Жамбыл облысының әкімі Бердібек Сапарбаев салтанатты түрде капсула салу рәсіміне қатысып, мұз айдыны мен бокс орталығының құрылысын бастап берді.
Мұз айдыны 2000 орынға есептелген. Мұнда жергілікті билік әлемдік деңгейдегі жарыстарды өткізуге ниетті. Арена 2022 жылдың үшінші тоқсанында пайдалануға беріледі деп күтілуде.
Жамбыл облысы әкімінің баспасөз қызметінің мәліметінше, бокс орталығының құрылысы бизнестің әлеуметтік жауапкершілігі аясында жүргізілуде. Екі қабатты ғимараттың жалпы ауданы 2000 шаршы метрді құрайды.
– Қасиетті Әулиеата жерінің спорттағы жетістіктері ауыз толтырып айтарлықтай. Жас ұрпақтың спортқа деген сүйіспеншілігін арттыру үшін қолдан келгеннің бәрін жасаудамыз. Жамбылдықтар Олимпиада тұғырына бірнеше рет көтеріліп, ел мерейін асырғаны белгілі. Бұл нысандардан алдағы уақытта да Олимпиада және әлем чемпиондарының жаңа легі өсіп шығады деп сенемін, – деді Бердібек Сапарбаев.
Сәулет және қала құрылысы басқармасының басшысы Арман Әбдешов «Тараз-Арена» спорт сарайының жанындаы спорт қалашығын одан әрі кеңейте түсу жоспарланып отырғанын хабарлады.
– Мұнда халықаралық стандарттарға сай келетін жеңіл атлетика манежі, теннис корты, үстел теннисі және көркем гимнастика орталығы салынады, – деді Арман Әбдешов.
