Пара Азиада. Қоржынға тағы 5 медаль түсті

Ханчжоуда өтіп жатқан Азия Пара ойындарының аясында Қазақстаннан келген спортшылар пара дзюдодан бірінші, екінші орынды иеленді.

Шешуші кездесуде Ерғали Шамей отандасы Асылан Нұрдәулетовпен күресті. Осылайша, қазақстандық пара дзюдошылар Қазақстан командасының қоржынына үшінші алтын және бесінші күміс медальді салды.

Біздің дзюдошылар тағы да керемет нәтиже көрсетті! Қазақстан сіздермен мақтанады және сіздерге жанкүйер. Алдағы турнирлерде де Қазақстан гимні шырқала берсін. Жаңа белестерді бағындырып, жарқын жеңістерге жете берулеріңізге тілектеспін,- деді ҚР Туризм және спорт министрі Ермек Маржықпаев.

Сонымен қатар, Динара Куджулова – Азия пара ойындарының қола жүлдегері атанды.

Қазақстандық Динара Куджулова Ханчжоуда өтіп жатқан Азия Пара ойындарында қола медаль жеңіп алды.

Үшінші орын үшін сайыста біздің отандасымыз өзбек спортшысы Мұхарраммхон Абдусаматованы жеңді. Жекпе-жек 70 келіге дейінгі салмақ дәрежесінде өтті.

Одан бөлек, Бауыржан Арыстанбеков Азия пара ойындарының қола жүлдесін қанжығалады.

Қазақстандық спортшы Бауыржан Арыстанбеков пара дзюдодан қола медаль жеңіп алды.

Үшінші орын үшін күресте біздің отандасымыз Индонезиядан келген палуанды жеңді. Жекпе-жек J1 санаты бойынша 90 кг салмақ дәрежесіндегі спортшылар арасында өтті.

Даяна Федосова – Азия пара ойындарының қола жүлдегері атанды.

57 кг салмақта өнер көрсеткен қазақстандық Даяна Федосова (J2 санаты) Азия Пара ойындарында дзюдодан қола жүлдегер атанды.

Медаль үшін күресте ол Үндістаннан келген спортшыны жеңді.