Қыздар асық ойнауға бейімделіп келеді
Заманмен бірге қазақтың салт-дәстүрі, ұлттық ойындары да жаңғырып келеді.
Өскелең ұрпақтың ойындардың атына ғана емес, затына да қанық екендігі қуантады. Соның бірі асық ойнау.
Ер балалардың асыққа үйір екені белгілі ғой. Кейінгі кезде қыздарымыз да бейімделіп келеді екен.
Елордалық Кәусар Серіктің бес асықпен айналысып жүргеніне бес жылдан асты. Бұрымды қыз осы уақыт аралығында асықты ұршықша иіріп, талай бәйгелердің алды болды. Тіпті ҚР чемпионатында да тұғырдың бірінші сатысынан көрінген.
Кәусар Серік, асық атудан ҚР чемпионы:
- Бірінші мені әпкем үйрете бастады жан-жақты. Содан кейін мектепте үйретіле бастады. Қазірде дамып келе жатыр. Менің, мысалы, үлкен әпкелерім бар, артымнан ерген сіңлілерім де бар ойнап жүрген. Ата-бабадан келе жатқан ойын ғой. Ойнағын келеді қызықты.
Қаладағы асық ату мектебінде оқушылардан бөлек ересектер де шеберліктерін шындайды. Қазір бұл жерде 11 спорт шебері, 20 спорт шеберіне үміткер бар. Қалалық асық ойыны федерациясы президентінің айтуынша бес асық ойынына қызығушылық көп. Өйткені бұл ойынның адам денсаулығына тигізер пайдасы мол.
Ескендір Рахметов, Астана қаласының "Асық ойыны" федерациясы президенті
- Бес асық ойыны арқылы біздің көзіміздің бұлшық еттері, қолдың моторикасы, мойын еттері одан қала берсе психикалық тұрғыдан жақсы тәрбиелейді. Отырып ойнаса да өте ұтымды, сұлу ойын қыздарға арналған. Денсаулыққа пайдасы өте мол. Ол қолжетімді ойын. Ықшам жерде ойнап шығасыз. Үлкен спортзалды талап етпейді. Түрлі-түрлі іс-шараларда қолданылатын қол жетімді спорт.
Ескендір Рахметовтың озық шәкірттерінің бірі Аружан Қуанова. Ол былтырғы жылы өткен 6 шы ұлттық спорт түрлері фестивальінің жеңімпазы. ҚР чемпионатының бірнеше дүркін жүлдегері. Енді ол күзде өтетін бәсі биік көшпенділер ойынына қатысуға ден қойып отыр.
Аружан Қуанова, ҚР Асық ойыны спортынан спорт шебері:
- Бұл ойынмен менің айналысып жатқаныма 2017 ден бері 6-7 жылдай уақыт болып қалды. Және бұл ойын ептілікті шеберлікті дамытады. Осының арқасында ептілік, шапшандық дамып келе жатыр. Бұл ойынды ойнаған өте қызық. Көбісі ойлайды онай ойын деп. Бұл қиын ойын негізінде.
Асық ойыны ұлттық ойындардың ішінде аса танымалы және қазақ халқының дәстүрлі ұлттық ойындарының ең қызықты әрі өте кең тараған түрі. Сондықтан ғасырлар бойы халықтың зердесінде сақталып келген осы бір ойынды өскелең ұрпақты тәрбиелеудің құралы ретінде пайдалансақ ұтарымыз көп болады.
Әлішер Әли, Мадияр Қындыбаев