V Дүниежүзілік көшпенділер ойындарының ашылу салтанаты өтті
Көпшілік тағатсыздана күткен V Дүниежүзілік көшпенділер ойындары шымылдығын түрді, деп хабарлайды 24kz.
Байрақты доданың салтанатты ашылу рәсімі «Астана Арена» стадионында өтіп, оны мыңдаған көрермен тамашалады. Дүниежүзілік көшпенділер ойындарының ашылу салтанатын отандық телеарналардан бөлек, әлемнің 19 телеарнасы көрсетті. Көшпенділер ойындары тарихында бұндай халықаралық деңгейде ауқымды телехабар тарату бірінші рет қолға алынды.
Ашылу салтанаты дәстүрлі түрде спорт делегацияларының шеруінен басталып, бұдан соң таңғажайып шоуға ұласты. Көрермен қауымға заманауи сахналық технологиялар мен мультимедиялық дизайн қолданылған 2 сағаттық ауқымды музыкалық-театрландырылған қойылым ұсынылды. Әлем көз тіккен ауқымды шараға 3000-ға жуық өнерпаз қатысты, оның ішінде облыстық шығармашылық ұжымдар өкілдері де бар.
V Дүниежүзілік көшпенділер ойындарының ашылу салтанаты Қазақстанның Халық әртісі Димаш Құдайбергеннің орындауындағы халықтар достығы мен бірлігі туралы музыкалық композициямен түйінделді.