Футзал: Қазақстан мен Португалия кездеседі
Екі дүркін әлем чемпионы Испания Венесуэладан жеңіліп қалды.
Өзбекстанның Әндіжан қаласында өтіп жатқан әлем біріншілігің 8/1 финалында қос команда арасында матч өтті. Нәтижесінде Венесуэла 2 де 1 есебімен испан футболшыларын жарыс жолынан тайдырды. Кеше тағы бір ойын Парагвай мен Ауғаныстан арасында болды. Матчтың негізгі уақытында қос команда да бір-бір голдан алмасып, ойын экстра-таймға ұласты. Қосымша уақытта Парагвай жігіттері екі гол салып, ширек финалға шықты. Экстра-таймнан кейінгі есеп 3 те 1. Ал бүгін кездесулер Иран мен Марокко және Қазақстан мен Португалия арасында өтеді. Біздің жігіттер ойынға тас түйін дайын. Қос команда арасындағы кездесу Өзбекстанның Әндіжан қаласында өтеді. Екі мықты бұған дейін 2021-ші жылғы әлем чемпионатының жартылай финалында кездескен болатын. Үш жыл бұрын португалдар пенальти сериясында жеңіске жетті. Финалда олар Аргентинадан айласын асырып, әлем чемпионы атанды. Сол жолы Ұлттық құрама 3-ші орын үшін таласта Бразилия есе жіберген болатын.
Дзюдо: жастар арасындағы ел біріншілігі аяқталды
Шымкентте дзюдодан 23 жасқа дейінгі спортшылар арасында Қазақстан біріншілігі аяқталды. Жарыс қорытындысы бойынша Жамбыл облысы көш бастады. Аталған өңір балуандары 2 алтын, 2 күміс және 4 қола медаль жеңіп алды. Екінші орынды 2 алтынға қол жеткізген Ұлытау облысы иеленді. Ал үздік үштікті 1 алтын, 2 күміс және 2 қол медаль еншілеген Қызылорда облысы түйіндеді. Алғашқы бестікке Атырау және Жетісу облысының командалары да енген.
Қазақ балуаны Азия чемпионы атанды
Қазақ балуаны Азия чемпионы атанды. Грек-рим күресінен 82 келіге дейінгі салмақта өнер көрсететін Диас Қаленге өткен жылғы Азия чемпионатының алтын медалі берілді. Спортты дамыту дирекциясының баспасөз қызметі атап өткендей, ол 2023 жылы көктемде Астанада өткен сары құрлық додасының финалына дейін сүрінбей жеткен. Алайда алтынға таласқан отандасымыз Қырғызстан балуаны Ақылбек Талантбековке 2:3 есебімен есе жіберіп, күміс жүлдемен жарысты аяқтаған еді. Жарыстан кейін қырғыз спортшысының анализінен тыйым салынған препарат анықталған. Нәтижесінде спортшының аталған Азия біріншілігіндегі жеңісінің күші жойылып, оны 4 жылға спорттан шеттетті. Осылайша, алтын медаль қайтадан қазақстандық Диас Қаленге тапсырылды.
«Барыс» хоккей клубының бас бапкері тағайындалды
«Барыс» хоккей клубының бас бапкері тағайындалды. Бұл қызметке ЦСКА, «Сочи» және «Нефтехимик» командаларын баптаған Вячеслав Буцаев келді. Ол елордалық клубпен маусымның соңына дейін келісімшартқа отырды. Бапкер ойыншы ретінде Олимпиада және әлем чемпионы атанып Ресей, Швеция біріншіліктерінде топ жарған. Одан бөлек Ұлттық хоккей лигасында 130-дан астам матч өткізген. Айта кетейік, кеше Барыс Мәскеулік Динамомен кездесіп, 3 те 1 есебімен есе жіберді. Бұл жергілікті команданың осы маусымдағы жетінші жеңілісі.