Аңсар Ниетқалиев жылдың үздік ойыншысы атанды
Аңсар Ниетқалиев жылдың үздік ойыншысы атанды. Қазақстан теннис федерациясы мәлім еткеніндей, жас өреніміз Еуропа одағына кірмейтін елдер арасынан озып шықты.
Биыл жоғары нәтижелерге қол жеткізген Аңсар рейтингте жылды 41-орынмен аяқтады. Осы маусымда жерлесіміз жекелей сында Soul Cup, Ankara Cup және Ergan Cup турнирлерінде жеңімпаз атанды. Оған қоса жұптық сында екі рет Soul Cup жарысында титулды жеңіп алды.
Auyl Sport үздіктері анықталды
Осыдан екі ай бұрын тасадағы таланттардың жолын ашу мақсатында «Ауыл спорт» жобасы қолға алынған болатын. Халық қайырымдылық қорының ұйытқы болуымен өткен осынау шараға еліміздің түкпір-түкпірінен дәлірек айтсақ 200 ауылдан 12 мың бала спорттың бірнеше түрінен өз бақтарын сынап көрді. Турнирдің финалдық кезеңдері Алматы қаласында өтті. Қазақтың спорт және туризм академиясында волейболшылар қыз-жігітттер сынға түссе, жас балуандар Достық спорт кешенінде белдесті. Еркін күресте Алматы облысының өрендері ешкімге дес берген жоқ. Атырау өңірі екінші орыннан көрінсе, Түркістан облысының палуандары үштікті түйіндеді. Ақ допты алақанда ойнатқан волейболшылар сайысында Солтүстік Қазақстан қыздары топ жарды. Ұлдар арасында Алматы облысының асығы алшысынан түсті. Іріктеуден іркілмей өткен 1300 спортшы одан өзге бокс пен каратэ және баскетбол мен шахмат спорт түрлері бойынша да жүлделі орындардың сарапқа салды. Ауыл балаларының жаңа көкжиегін ашып, спортқа деген қызығушылығын оятып, үлкен жетістіктерге алғашқы қадам жасауына мүмкіндік берген жоба алдағы жылы да жалғасын табады деген ойдамыз.
Абат Айымбетов Түркияда қатарынан үшінші матчта гол соқты
Абат Айымбетов Түркияда қатарынан үшінші матчта гол соқты. Суперлиганың 17-турында «Адана Демирспор» сырт алаңда «Хатайспормен» кездескен болатын. Матч 3:1 есебімен қонақтардың пайдасына шешілді. Кездесудің 75-минутында Абат Айымбетов гол соғып, ойын нүктесін қойды. Ұлттық құрама шабуылшысы оң жақ қапталдан келген допты қақпаға дәл бағыттады. Бұған дейін жерлесіміз «Бешикташ» пен «Гёзтепе» клубтарының қақпаларынан саңылау тапқан. Осылайша ол 11 ойында үш голмен ерекшеленді. Дегенмен оның командасы турнир кестесінің соңғы сатысында келеді. 16 матчта небәрі 5 ұпай жинаған.
«Барыс» елордада «Трактормен» кездеседі
«Барыс» бүгін елордада Ресейдің «Трактор» командасымен кездеседі. Ойын 19:00-дe басталады. Қос команда бұған дейін 59 мәрте кездескен. Оның 31-i елордалық клубтың басымдығымен аяқталса, қалған ойында ресейлік команда жеңіске жеткен. Кейінгі бес кездесудің төртеуінде қазақстандық клуб аталған қарсыласынан басым түсті. Қазір турнир кестесінде «Барыс» 21 ұпаймен 22-орында тұрса, «Трактор» 50 ұпаймен 4-орында келеді. Елордалық клуб бұдан кейінгі ойынын «Cибирь» клубына қарсы өткізеді.