Қостанайда аутизм орталығы ашылды

Қостанайда ерекше балаларға арналған орталық ашылды.

Әлеуметтік нысан бір мезетте 200 балаға тегін қызмет көрсетеді. Құрал-жабдықтың бәрі заманауи үлгіге сай. Нысанда дене шынықтырумен қоса, оқыту-әдістемелік және еңбек терапиясы арқылы жаттығулар жасайтын бөлмелер бар. Мекеме облыс әкімдігі, «Самұрық-Қазына» және «Қазақстан халқына» қорларының қолдауымен пайдалануға берілді.

Оңалту орталығында жүрген бұл бүлдіршіндерге аутизм диагнозы қойылған. Бұған дейін олардың ата-аналары балаларын тек ақылы түрде емдеуге мәжбүр болған. Енді 200 балаға шақталған тегін денсаулық орталығы ашылды. Ата-аналар бұл жаңалықты көптен күткен.

Майра Бектасова, қала тұрғыны:

- Қажетті құралдармен жабдықталған. Орталықта көптеген білікті маман жұмыс істейді және балаларға жағдай жасалған. Орталық бізге ұнады.

Мекеме балаларды дәрісіз емдейді. Психолог, дефектолог пен логопед сияқты 100-ден астам білікті маман бар.

Жанат Құсайынова, оңалту орталығының директоры:

- АВА-терапевтер, сосын «гончарный мастеріміз» бар. Кәсіби тігінші істейді. Балаларға қандай қабілет ұнайды, сол ертең өсіп, біздің орталықтан шығып кеткенде мүмкін біреу тігінші болар, сәулетші болар, мұғалім болар.

Орталыққа «Samruk-Kazyna Trust» қоры арқылы 150 миллионнан астам теңге жұмсалған. 

Ғибрат Ауғанов, «Самұрық-Қазына» қорының басқарушы директоры:

- Оңалту орталығы аутизм бағыты бойынша Қазақстанда 3 жылда, бүгінгіні қосқанда 37 орталық ашты. Осы жылдың соңына дейін ерте араласу орталығын Қостанай қаласында ашуды жоспарлап отырмыз. Ол жерде де бүкіл заманауи құрал-жабдықтар болады. 

Қазір облыс бойынша 400-ге тарта бала аутизм диагнозымен тіркеуде тұр. Бұл орталық оларды жүйелі түрде емдеп, ой-өрісінің дамуына септігін тигізеді, – дейді мамандар.

Авторлары: Данияр Сұлтанұлы, Ермек Мұхамедияров.