Қарағандыда машина жасау бойынша олимпиада жеңімпаздары анықталды

Қарағандыдағы құю-машина жасау зауытында республикалық олимпиада өтті, деп хабарлайды 24kz.

Мектеп және колледж оқушылары арасында ұйымдастырылған зияткерлік сайыста 200-ге жуық қатысушының ішінен 12-сі финалға шықты. Ақтық сында үздік үштік анықталып, жоғары оқу орнына білім гранты, бір жылға шәкіртақы және бағалы сыйлықтар табысталды. Олимпиада Әбілқас Сағынов атындағы Қарағанды техникалық университетімен бірлесе ұйымдастырылған.

Олимпиаданың ақтық сайысында қатысушылардың теориялық білімі және тәжірибелік қабілеті сыналды. Сауалнама бөлімінде болашақ машина жасаушыларға химия, физика, сызу пәндерінен және өндірістік қауіпсіздікке қатысты сұрақтар қойылды. Кейін металл бөлшектерді жинау, дәнекерлеу, қондырғыларды бағдарламалық басқару бойынша тәжірибелік сынақтарды тапсырды. «Соның негізінде ең мықтылары анықталды», - дейді кәсіпорынның коммерциялық директоры Светлана Алексеева.

Светлана алексеева, Қарағанды құю-машина жасау зауытының коммерциялық директоры:

- Олимпиаданың мақсаты – машина жасау ісіне жастардың қызығушылығын ояту. Елімізде бұл сала дамымаған. Жастардың көбі қазіргі жаңа мамандықтарға ойысып жатыр. Машина жасау маңызды өндірістік сала болғанымен, мамандар тапшы. Президент биылғы жылды жұмысшы мамандықтарының жылы деп жариялады. Соның аясында осындай ауқымды бастамаларды қолға алдық.

Білім сайысы жеңімпаздарының бірі – Аспандияр Самұратұлы. Ол Балқаш техникалық колледжінің 4-курсында оқиды. Талапты жас 4 жылдық білім грантын ұтып алды. Енді еліміздегі машина құрастыру мамандығы бойынша оқытатын ЖОО-ның кез келгеніне барып білім алуына болады.

Аспандияр Самұратұлы, олимпиада жеңімпазы:

- Олимпиада өте жоғары деңгейде өтті. Барлығы үнады. Өте жоғары деңгейде сезімім. Айтып жеткізе алмаймын. Осы Қарағандыға, Алла жазса, машинастроениеге барып оқимын.

Ал үшінші орын иегері, Оралдағы зияткерлік мектептің оқушысы Дана Тажмұқанға соңғы үлгідегі MacBook табысталды.

Дана Тажмұқан, олимпиада жеңімпазы:

- Мен 16 жастамын. Машина жасау мамандығы бойынша оқығым келеді. Бала күнімнен осы салаға қызығамын. Физика, математика пәндерінен жетістіктерім жақсы. Болашағымды осы мамандықтан көремін.

Олимпиадада екінші орынды жеңіп алған Қарағанды техникалық университетінің студенті Даниял Оспанов енді жыл бойы шәкіртақы алып тұрады.

Авторлары: Руслан Нұрланұлы, Сайран Ақамбаев, Зарина Зулпыхар