Елдің шығысында 40 градусқа дейін аяз болады

Елдің бірнеше өңірін аяз қысып тұр. Солтүстік Қазақстанда 1-9-сынып оқушылары қашықтан білім алатын болды. Сондай-ақ Шығыс Қазақстан, Қарағанды, Ақтөбе облысының кейбір аудандарында сабақ онлайн болады. Астанада бірінші аусымдағы мектеп оқушылары және колледждің 1-2 курс студенттері де үйден шықпай білім алады.

Қазгидромет мамандары алдағы күндері елге арктикалық суық ауа ағындары әсер етеді деп отыр. Республика бойынша боран, көктайғақ, тұман, екпінді жел соғады. Солтүстік өңірлерде 35 градусқа дейін суытады. Ал елдің орталығы мен шығысында 40 градусқа дейін қатты аяз болады. Қазір Астанада сынап бағанасы -24 градусты көрсетіп тұр. Бірақ далада жел, аяз бет қаратпай тұр. Сондықтан температура одан да төмен болуы мүмкін. Мамандар далаға шыққанда барынша абай болуды ескертеді. Сондай-ақ боран салдарынан жабылған тасжолдарда көлік қозғалысы біртіндеп ретке келіп жатыр.