Таразда «XXI ғасыр көшбасшысы» зияткерлік сайысының облыстық іріктеу кезеңі өтті
Тараз қаласында да «XXI ғасыр көшбасшысы» зияткерлік сайысының облыстық іріктеу кезеңі өтті, деп хабарлайды 24kz.
Сайыста 100-ге жуық оқушы бақ сынады. Олар бұған дейін мектепішілік және аудандық кезеңде білімін сынға салған мыңға жуық қатысушының арасынан үздік шыққандар. Енді шын жүйріктер анықталып, республикалық кезеңге жолдама алды.
Білім сайысына келгендер «Хабар» арнасының «ХХІ ғасыр көшбасшысы» зияткерлік ойынын көріп өскен. Барлығы да облыстық іріктеу кезеңінде жеңімпаз атанып, республикалық додаға баруға үмітті. Жалпы жүйріктер бәйгесінің облыстың кезеңіне 100-ге жуық үміткер бақ сынады.
Майра Есенәлиева, «Жамбыл дарыны» ғылыми практикалық орталығының директоры:
- Бұл ойынға қатысқан оқушылар еліміздің болашағына үлкен үлес қосатын азамат болады деген сенімдеміз. Өйткені мың оқушының арасынан суырылып шығып көшбасшылықты сезіне білетін оқушыларды табу таңдау және ол оқушыларды ары қарай дамыту болып табылады мақсатымыз.
Өңірлік іріктеу кезеңі 2 сайыстан тұрады. Үздік оқушылар алдымен 60 сұрақ бар тест тапсырды. Оларға 1 сағат 15 минут уақыт берілді. Қатысушалар мектеп бағдарламасы мен логикалық сұрақтардан құраған сауалдарға жауап беруі тиіс.
Нұрсәт Сейіт, Дарынды балаларға арналған мамандандырылған лицей оқушысы:
- Сұрақтары өте қызықты шатаспасам, 12 пәнді қамтып алған. Әртүрлі пәннен сұрақ, логикадан да қосатын жерлері бар және де нақты пәнге де қатыстылары бар. Өзім жақсы жауап бердім деген ойдамын. Бұйырса, екінші кезеңде кездесеміз.
Жадыра Жанболатқызы, Бірлесу-еңбек орта мектебінің оқушысы:
- «ХХІ ғасыр көшбасшысын» бағдарламасын мен кішкентай кезімде телеарнадан көретінмін. Қазір өзім осы ойынға қатысып отырғаныма өте қуаныштымын. Жалпы бұл ойынға тек үздіктер ғана қатысады. Сол үздіктердің құрамында болғаныма шын жүректен қуаныштымын.
Тестілеуден ең жоғары бал алған 10 сайыскер екінші айналымда сынға түсті. Мұнда оқушылардың жеңімпаз атануы үшін білімі мен қоса жылдамдығы да рөл атқарды. Себебі олар 1 минут ішінде 10 сауалға дұрыс жауап беруі тиіс. Тартысты сайыстың нәтижесінде Даниял Ақылбек, Әміржан Тілеукен, Нұрай Дәулет пен Жанболат Аман және Әйгерім Мырзабай жеңімпаз атанды. Енді олар республикалық кезеңде облыс намысын қорғайды.
Авторлары: Мерей Бает, Бақытжан Бапаев