Халықаралық олимпиадаларда топ жарған қазақстандықтар саны артып келеді

Білім сайыстарына сұраныс артып барады, деп хабарлайды 24kz.

Мамандар оқушылар қатысатын халықаралық олимпиадалар арасында 7 олимпиадаға ерекше мән береді. Бұл додалар математика, физика, биология, химия, лингвистика, география және информатика пәндері бойынша өтеді.

Жыл санап аталған сайыстарда топ жарған қазақстандықтар саны артып келеді. Мәселен, 2023 жылы жас отандастарымыз 23 медаль иеленсе, былтыр 26 жүлдені жеңіп алды.

Нұрқанат Қанапия, тілші:

- Оқушылар қатысатын халықаралық олимпиадалардың арасында 7 бәсекенің беделі жоғары. Себебі бұл білім бәйгелерінде кемі 50 елдің өкілі сынға түседі. Және бір елден әр пән бойынша 4-5 баланың ғана қатысуына мүмкіндік берілген. Яғни, әлемнің әр түпкірінен ең білімді оқушылар барады. Қазақстан құрамасының сапында 20-ға жуық бала бар. Алматылық Бекасыл Елубай осы құрамаға кіріп, олимпиадаға баруға үмітті.

Бекасыл Елубай, ХХІ халықаралық Жәутіков олимпиадасының жеңімпазы:

- Биыл енді бұл олимпиада Парижде болады. Соған өтуге үміттеніп отырмын. Қазіргі таңда соған қатысу үшін бізде емтихандар алынады. Жәутіков олимпиадасы, барлығын есептеп, құрама құралады. Мен соған үміткермін, сол олимпиадаға қатысуға.

Құрамаға ену оңай емес. Үміткер үздіксіз ізденіп, қажымай еңбек етуі қажет. Түрлі деңгейдегі жарыстарда топ жаруы керек. Яғни, құрамаға іріктеуге дейін мектептегі, аудан-қала мен облыстағы олимпиадада шын жүйрік екенін дәлелдеуге тиіс.

Нұрлан Жұмагелді, «Дарын» РҒПО директорының орынбасары:

- Республикалық олимпиадада 1-орын алған балалар бізде ұлттық құрама деген болады, Қазақстан Республикасының ұлттық құрамасы. Онда шамамен 18-20 баланың көлемінде болады. Осы 18-20 баланың ішінен 4 бала іріктелініп алады. Бұлар қалай іріктеледі? Біз оқу-жаттығу жиындарын өткіземіз жылына үш рет, төрт рет. Олармен жаттықтырушылар жеке жұмыс жасайды. Бұл балалардың сабақ барысында көрсетілген тапсырмаларды орындауы, білім деңгейі, сосын алдындағы олимпиадаларда жеткен жетістіктерінің көрсеткіші бойынша 4 бала Қазақстанның атынан біздің намысымызды қорғауға барады.

Былтыр Қазақстан құрамасы 7 олимпиадада 26 медаль жеңіп алды. Оның ішінде 2 алтын, 12 күміс және 12 қола медаль иегері бар. Бұлардың барлығы отандық жоғары оқу орындарында тегін оқу мүмкіндігіне ие болды.

Авторлары: Нұрқанат Қанапия, Қанат Махмұтов