Атырауда «Таза Қазақстан – таза аймақ» пікірсайыс турнирі өтті

Атырауда «Таза Қазақстан» акциясы аясында жастар арасында «Таза Қазақстан – таза аймақ» тақырыбында пікірсайыс турнирі өтті, деп хабарлайды 24kz.

Оған 12 команда қатысты. «Жастар арасында экологиялық мәдениетті қалыптастырып, тазалыққа үйрету мақсатында мұндай іс-шаралардың маңызы зор», - дейді ұйымдастырушылар. Пікірсайыс қорытындысы бойынша үздіктер ақшалай сыйлықтармен марапатталды.

Шұғыла Болғанбай, қатысушы:

- Бұл дебат турниріне еліміздің ахуалына бей-жай қарамайтын жас студенттер жиналған деп білемін. Жалпы дебатта әртүрлі мәселелер көтерілуде. Бұл дебат турниріне әрбір студенттің қатысуы, өз ойын білдіруі – осы мәселенің шешуіне өз қосқан үлесі деп білемін. Осындай шаралар көп ұйымдастырылса, бұл студенттерді қолдауға жақсы мүмкіндік болар еді деп есептеймін.

Нариман Төрехан, ұйымдастырушы:

- Пікірсайысқа қатысушы 24 қатысушы, 12 команда іріктеліп алынды. Бүгін осы жастар арасында неше түрлі, әртүрлі тақырыптар бойынша осы пікірсайыс жүреді. Негізгі тақырып – экология. Себебі дәл қазіргі сәтте экология проблемасы – бүкіл әлем бойынша негізгі мәселенің бірі.