Елімізде күріш өндірісі төмендеді

Отандық күріш өндірісі

2023 жыл: 205  096 мың тонна

Қызылорда обл.  – 188 766

Алматы обл. – 9  525

Түркістан обл. – 6 667

Жетісу обл. – 138

2022 жыл: 223  935 мың тонна

Қызылорда обл.  – 207 152

Алматы обл. – 8 946

Түркістан обл. – 7 833

Жетісу обл. – 4

Былтыр еліміздің күріш өндірушілері 205 мың тоннадан астам өнім өндірген. Оның 92 пайызы күріштің отаны саналатын Қызылорда өңіріне тиесілі. Мына кестеден байқасақ, 189 мың тоннаға жуығын өндіріпті. Алматы облысы 9,5 мыңнан сәл асырса, Түркістан 6600-дей, ал Жетісу аймағы 138 тоннасын шығарған. Дегенмен былтырғы өндіріспен салыстырсақ, 8,4 пайызға кемігенін көреміз. Қызылордалық өндіріс 18 мың тоннаға кеміген. Сол сияқты Түркістан облысында да мың тоннаға қысқарды. Есесіне, Алматы және Жетісу өңірлері өндірісті ұлғайтыпты.

Ұлттық статистика бюросының мәліметіне үңілсек, былтыр 11 айдағы күріш импорты 3 есе өскен. 2022 жылы сырттан 9,5 мың тоннаға жуық өнім әкелініпті. Ал былтыр қарашаға дейін ішкі нарыққа 26 мың 600 тоннасы жеткізілді. Экспортқа тоқталсақ, мұнда жағымды өзгеріс бар. 2022 жылы 99 мың тоннадан астамы шетке саудаланса, былтыр 102 мың 500 тонна күріш жеткізіппіз.

Қазақстанның күріш өңдеу және өндіру қауымдастығының бас сарапшысы Сағидолла Сыздықов былтырғы егін түсімі жақсы болғанын айтады. Су тапшылығы, қуаңшылық сияқты факторлар аса бір ықпалын тигізбеген. Тек елдегі дүкен сөресінде ұсынылған Ресей мен Беларусьтің арзан күріші, отандық өнімді өткізуге кедергі келтіріп отыр.

Осы ретте диқандарға қолдау керек. Үкімет көмектесіп те отыр, бірақ ол аздық ететін көрінеді.

Қызылорда

Сағидолла Сыздықов, Қазақстанның Күріш өңдеу және өндіру қауымдастығының бас сарапшысы:

- Бізге бір субсидия береді, ауыл шаруашылығы саласында жұмыс істеп жатқан мекемелерге. Бірақ оны утильсбормен алып кетеді. Тағы бір субсидия береді, техникаға НДС қосып сол субсидияны алып кетеді. Осы уақытқа дейін жұмыс солай келді. Жаңағы бір қалтадан алады да екінші қалтаға алып кететін жағдай болды. Жаңа премьер министрдің сөзін естіп жатырмын. «көп сөйлемей іске кірісейік» деп. Осы мәселелерді шешіп берсе, негізі жақсы болатын еді деп санаймын.

Әйтсе де биыл дизель отынының бағасы арзандауы диқандардың нәсібін арттырады деген үміт жоқ емес. Оның үстіне қазақстандық күріш Еуразиялық экономикалық одақ елдерінің өнімімен бәсекеге түсетіндей деңгейде.

Сапа жағынан бәсекеге қабілетті болса, онда неге сырттан күріш алдыруға мәжбүрміз? Әлде Ресейлік күріштің сапасы біздікінен жақсы ма?

Мәселе сапада емес, оның бағасында. Күріш өндірісі қауымдастығы өкілінің айтуынша, Ресейде оның өнімділігі жоғары. Қызыорда облысында бір гектардан 55 центнер алынса, Краснодарда, мысалы, 65 центнерден өндіріледі. Әрине осы жерде өзіндік құны төмендеу болады. Оған қоса әлгінде айтып кеткендей, ол жақта шаруаларға мықты мемлекеттік қолдау көрсетілетін сияқты.

Импортты алмастыру саясатын тоқтату қажет

Үкімет отандық шаруаларды қолдағысы келсе, азық-түлік импорттын алмастыру саясатын тоқтату қажет. Аграрлық экономикаға талдаған халық файнанс сарапшылары осындай тұжырымға келді. Олардың пайымынша, азық-түлік қауіпсіздігін қамту үшін өнімнің барлығын елде өндіру міндет емес. Бағасы арзан, сапасы жақсы болса, ондай өнімді сырттан алдырса да болады. Бұл ретте Жапония, Германия, Оңтүстік Кореяның тәжірибесі көпке үлгі, дейді сарапшылар.

Мәселен, жақында үкімет жүгері өсіретін кәсіпкерлерімен отырыс өткізген болатын. Онда дақылды Қытай және Иран тәрізді шетел нарықтарына экспорттау мәселесі талқыланды. Осы ретте сарапшылар жүгері өнімділігі жөнінен еліміз Ресей, Украина тәрізді алып аграрлық мемлекеттерден көш ілгері тұрғанын айтады. Сондықтан бәсекеге қабілетті өнімді экспорттауға көбірек көңіл бөлген жөн дейді.

Санжар Қалдаров, Halyk Finance талдау орталығының бас сарапшысы:

- Біздің ойымызша, осы тәрізді шаралар басқа ауыл шаруашылықтарына қатысты қолдануы керек. Яғни экспортты ынталандыру арқылы мемлекет ауыл шаруашылығы өндірушілерінің валюталық түсімдерін көбейтіп, осы арқылы табыстарын да көбейтеді. Бұдан бөлек, бұл Қазақстанның экспорты құрылымын әртараптандыруға септігін тигізеді және Қазақстанның халаықаралық нарықтардағы өзінің жеке имидждін арттыруға мүмкіндік береді.

Сонымен мамандардың пікірінше аграрлық өнімдердің экспортын ынталандыру тек бәсекеге қабілетті тауарға ғана жүргізілуі қажет.

Қызылорданың күріші бәсекеге қабілетті санала ма?

Салалық қауымдастықтың бас сарапшысы Сағидолла мырзаның сөзіне сенсек, бүгінде Қызылорданың күріші Түркия, АҚШ, Еуропада таныла бастады. Оның үстіне зауыт өндіретін күріштің 40 пайызы ішкі нарыққа, 60 пайызы шетелге кетіп жатыр. 

Бірақ мұнда да қатер жоқ емес. Әдетте Тәжікстан, Өзбекстан, Қырғызстанға экспортталатын отандық өнім Ресейдің күрішімен бәсекеге түсе ала ма? Міне, мәселе қайда жатыр. Бұл түйткілдің шешімі әрине, жаңадан жасақталған үкіметке байланысты болмақ. Түптеп келгенде «Бұл нарық!»