Қарағанды облысында егіс науқаны қарқын алды

Қарағанды облысындағы ең ірі шаруа қожалықтарының бірі егін егу науқанына кірісті, деп хабарлайды 24KZ.

Агрохолдингтік компания картоп және дәнді-дақылдардың элиталық сұрпын өсіреді. Мұнда тамшылатып суару технологиясы да жылдан-жылға кеңінен қолданылып келеді. Соның арқасында өнімділік 20%-ке артқан.

Шаруашылықта 150 адам еңбек етеді. Олар ай соңына дейін 17 мың гектар жерге бидай мен картоп егуі тиіс. Элиталы тұқымды Еуропадан және көршілес елдерден әкелген. Сұрпына қарай тұқымды себер алдында қажетті мөлшерді енгізіп, агрегатты дайындап алады.

Алексей Горбань, шаруашылық технологы:

- Міне, мен әр гектарына 3,5-3,6 миллион дән себу мөлшерін таңдадым. Осылайша, тұқымның ірілігіне, түріне қарай өзгертіп отырамыз. Егін себу кезінде әр дәнге жетерлік арақашықтық сақталуы керек. Бұл бидайдың еркін өсуіне жағдай жасайды.

Мамыр айының соңында мына дизельді қозғалтқышпен жұмыс істейтін тамшылатып суару агрегаттары іске қосылады. Біреуі 5 трактордың жұмысын атқарады. Оларға су алқаптағы бетон каналдар арқылы келеді. Соның арқасында өнім көлемі 20%-ке дейін артады екен.

Руслан Нұрланұлы, тілші:

- Мына агрегат 250 гектар алқапты тамшылатып суарады. Шаруашылықта мұның төртеуі бар. Соның арқасында жаз айларында егінді суаруға жұмсалатын су 30%-ке дейін үнемделеді екен.

Биыл өңір бойынша 1 миллион гектардан астам алқапқа егін салынады. Бұл – егістік алқабы өткен жылмен салыстырғанда 36 мың гектарға ұлғайған деген сөз.

Сырым Бошпанов, облыстық ауыл шаруашылығы басқармасының басшысы:

- Жанар-жағармай, осы жұмыстарға бізге 17,4 мың тонны бөлінген болатын. Бүгінгі күні біздің екі оператормен дизель отыны сәуір айына толық тасылып, қазір енді 245 теңгеден литрін толық босатып жатыр. Міне, бүгінде мамыр айына 9,4 мың тонна дизель отынға келісімшарт жасалып, ақшасы төленді.

Өңірде тамшылатып суғару алқаптары 4,5 мың гектарға көбейген. Бұл технологияны 35 шаруашылық қолданысқа енгізіпті. Облыстағы 20 шаруа қожалығы шетелден элиталы тұқым сатып алған.

Авторлары: Руслан Нұрланұлы, Сайлау Игіліков, Зарина Зұлпыхар.