Жамбыл облысында ҚР Қарулы күштерінің үздік сержанттары анықталды

Жамбыл облысында Қазақстан Қарулы күштерінің үздік сержанттары анықталды, деп хабарлайды 24kz.

Республикалық «Үздік сержант» байқауына елдің барлық аймағынан іріктелген 118 әскери қатысты. Олар 5 күн бойы жауынгерлік дайындығы мен білім-біліктілігін сарапқа салды.

Мерей Бает, тілші:

- Жалпы әскерлік жарысқа өз өңірінде үздік атанған сержанттар қатысты. Жауынгерлер 7 номинация бойынша бақ сынады. Білім сайысында әскери жарғыларды жатқа айса, өнер кезеңінде шығармашылық қабілетін ортаға салды. Үздік «Батальон сержанттары» аталымында десанттық шабуылдау бөлімінен келген Жігер Нұршабаев үздік атанды.

Жігер Нұршабаев, Десанттық шабуылдау әскери бөлімінің батальон сержанты:

- Қарсыластардың барлығы оңай болған жоқ. Барлығы дайындалған білім жағынан да физикалық жағынан да ой өрістері жақсы дамыған жігіттер болды. Қарсыластар бәрі жақсы дайындалып келген. Өскелең ұрпақ осы бізге қарап рух алып, жігерленеді деген ойдамын.

Жарыстың ең маңызды кезеңі – жауынгерлік дайындық. Сержанттар нысанаға дәл ату, қаруды бөлшектеп қайта құрау, граната лақтыру, алғашқы медициналық көмек көрсету бойынша дағдыларын көрсетті. Бұзылған рацияны жөндеп байланысқа шығу және 15 келілік жүкпен 10 шақырымға жүгіру сындарынан өтті. Жарыс қортындысы бойынша Аягөз қаласынан келген Дархан Аслан еліміздің үздік сержанты атанды. Ол бұған дейін Арменияда өткен әлем жауынгері байқауында ел құрамасымен барып бірінші орынды иеленген.

Дархан Аслан, 54835 әскери бөлімінің батальон сержанты&

- Бұл барлық қызметімнің көрсеткіші. Осыған дейін де басқа да жарыстарға қатысып көптеген тәжірибенің арқасында жеткеннің бірі ғой. Әскери адам болғандықтан, әскери киім кигендіктен, қай жерде болмасын барлығына үлгі болып жүру керекпіз.

Сержанттар сайысына Америка құрама штаттарының әскери қызметкерлері де қатысты. Олар Қорғаныс министрлігінің АҚШ-пен мемарандумы аясында аймаққа келген. Жалпы сайыс жауынгерлерге өзара тәжірибе алмасуға мол мүмкіндік беріп отыр.

Темірбек Халықов, ҚР Қарулы күштерінің бас сержанты:

- Жақсы көрсеткен үздіктердің тәжірибелерін жинауға, олар қалай, қандай мүмкіншілікпен осы дәрежеге жетті, қандай жаттығулар жасады деген сияқты нәрсенің бәрін сараптап енгіземіз қайтадан. Бұл әшейін ғана жарыс емес. Сержанттың қыр-сырын, сегіз қырлы бір сырлы болады деп сержанттарды дайындаймыз. Өйткені сарбаздарды дайындайтын сол сержант.

Қорғаныс министрлігі мамандарының сөзінше, республикалық жарыста жеңіске жеткендер халықаралық жарыстарда ел намысын қорғайды. Сонымен қатар қызметте өсуіне де басымдық берілмек.

Авторлары: Мерей Бает, Бақытжан Бапаев, Елдар Байділдә