Ақтөбеде 30-дан астам мұз айдыны бой көтерді

Балалардың қысқы демалыс күндерін тиімді өткізу үшін бірнеше хоккей алаңы да даярланған.

Биыл әдеттегі қоғамдық орындардан бөлек оқу ордалары да шаңғы жолдарын жасап, мұз айдынын жарақтауды қолға алыпты.

Хиуаз Доспанова атындағы орта мектептің ауласы биыл мұз айдынына айналды. Балалармен қатар кез келген қала тұрғыны бұл жерде тегін сырғанай алады. Бастысы конькиің болса болғаны. Ал білім ордасына тиесілі құрал-жабдықтар тек оқушыларға беріледі. Мектеп басшылығы жеткіншектердің қысқы спорт түрлерімен шұғылдануға жағдай жасаған. 

Сәбит Шүйтенов, Х.Доспанова атындағы №14 мектебінің директоры:

- Дене шынықтыру сабағында қысқы спорт түрлері үшінші тоқсанда қарастырылған. Соның аясында біз қысқы спорт түрлері: шаңғы, коньки, хоккейді де қолға алып жатырмыз. Әзірше құрал-жабдықтарымыз жоқ хоккейге. Дегенмен дайындық жұмыстарын жүргізіп жатырмыз. Және де қар үстіндегі футбол дамып келеді мектебімізде.

80 жылдық тарихы бар мектепте қазір 1391-ге жуық оқушы білім алады. Былтыр оқу ордасына қосымша ғимарат салынды. Құрылыс кезінде қазылған құдық мектептің қажетіне жарап отыр. Жаз мезгілінде ауладағы бақшаны суарса, қыста мұз айдынына қажетті суды алыстан тасып әлек болмайды.

Сәлима Бақытжанова, оқушы:

- Бұрын катокқа бару үшін біз автобуста, таксиде бару керек едік. Ал қазір үйдің алдында. Барлығы жақсы. Біз міне әдемі каток тебе аламыз. Соған ризамын. 

Оқу ордасы бюджеттен бөлінетін жан басына шаққандағы қаржыландыру есебінен 30 коньки мен 10 жұп шаңғы сатып алған. Бұл шешімді мектептің қамқоршылық кеңесі де қолдады. 

Бақытжан Сәуменов, Х.Доспанова атындағы №14 мектептің қамқоршылық кеңесінің төрағасы:

- Ол дейтін балалардың қауіпсіздігі. Бала басқа катокқа бармайды, басқа аулаға бармайды. Ол таза өзінің мектебінде, мұғалімдерінің көз алдында конькиін теуіп жүреді. Ата-ана баланың мектепке кеткенін біледі. Бірдеңе болса мұғаліміне хабарласады.

Жалпы облыс орталығында 30-дан астам мұз айдыны бар. Орталық саябақ пен түрлі ойын-сауық орындарын айтпағанда 10 білім ордасы коньки теуіп, хоккей ойнауға алаң даярлаған. Бұдан бөлек қысқы спорт түрлері бойынша облыстық балалар мен жасөспірімдер спорт мектебінде де тегін шұғылдануға болады.

Мансұр Есқожин, Айнадин Молдабеков, Айбек Даутов