Түркияда ұрылар мүлікті тонап жатыр

Түркияда үйлер мен ғимараттар жермен-жексен болып, 30 мыңдай адам зілзаладан қырылып жатқанда ұрылар дүкендерге ауыз салды.

Алды-артына қарамай зытып бара жатқан мына адам Антакия қаласындағы ұрлық кезінде көзге түскен. Ашуға булығып, ашынған кәсіпкерлер арсызды аямай ұрып, бет-аузын қан-жоса қылған. 

- Зілзала кезінде дүкенімнің керіберіс қабырғасы құлап қалған болатын. Соны пайдаланған қаскүнемдер 70 мың лира қолмақол ақшамды және біраз қымбат тауарымды үптеп кетті.

- Дүкеніміз жермен-жексен болған. Ұрылар осы маңдағы дүкендерді және жолдағы базарды тонап кетіпті. Түк қалдырмаған.

Бұл бұл ма. Ұрылар дүкен-базарды қойып, үйлер мен көліктерді арсыздықпен тонауға көшкен.

- Ұрыларда иман жоқ. Олар үйлерімізді, көліктерімізді тонап жатыр. Қалған затымызды, шамамыз келгенше қорғап жүрміз.

Тонауға ашық кіріскен ұрылар ашындырған соң, атыс-шабыс та көбейген. Әрбір жерде оқ атылып, құтқару ісіне қауіп төнді. Біреуді құтқарамыз деп Австралия мен  Германиядан келген мамандар жұмысты еріксіз тоқтатып, өздері бас сауғалауға мәжбүр.

Стивен Байер, Германиядан келген құтқарушы:

- Зілзала болғалы 6 күннен бері тоқтаусыз жұмыс істеп жатыр едік, қауіпсіздік мәселесі ушыққан соң өзіміз бірдеңеге ұшырап қалмауымыз үшін құтқару ісін уақытша тоқтаттық. Жағдайдың толық бақылауға алынғанын күтеміз.

Президент Режеп Тайып Ердоған ұрлық-қарлықты тез арада тоқтатып, ұсталғандарды қатаң жазалау туралы арнайы жарлық шығарды.

Реджеп Тайип Ердоған, Түркия президенті:

- Төтенше жағдай туралы заң қабылдадық па? Қабылдадық. Бүкіл ел зілзаладан зардап шегіп, зарлап жатқанда, ұрыларды тайраңтадып қоюға болмайды. Базарлар тоналған. Біздің халық мұндай күнәға бармауы керек. Шын мұқтаждарға кәсіпкерлер қолындағы барын береді.

Түркияның Қорғаныс министрлігі көшелер мен базарларда қауіпсіздікті күшейту үшін арнайы әскер шығарды. Әділет министрі қазірдің өзінде 64 ұрының қамауға алынғанын хабарлады.

Ернат Қашқынов