Жапония ғарыш кемесін Айға қондырды

Жапония Айға ғарыш кемесін ұшырған бесінші ел атанды.

Жеңіл модуль Жер серігіне сәтті қонды. «Құрылғыда нүктелік түсіру деп аталатын технология қолданылған. Ол алдыңғы Ай миссиясының модульдеріне қарағанда бақылауды көбірек қамтамасыз етеді», - дейді мамандар.

Айта кетерлігі, бұл - Жапония аэроғарыш агенттігінің 20 жыл жасаған зерттеуінің жемісі. Құрылғы Айды зерттеу үшін топырақ үлгілерін алып, арнайы камераның көмегімен минералдарды талдайды.

Хироси Ямакава, Жапония аэроғарыштық зерттеулер агенттігінің президенті:

- Айды зерттеуге арналған интеллектуалды қондырғы Жапонияның жергілікті уақыты бойынша 20 қаңтарда сағат 0:20-да Айдың бетіне қонғанын растаймыз. Ғарыш кемесі Жапониядағы станцияға деректерді жіберді. Сондай-ақ, Жерден командаларды дұрыс қабылдап тұр. Алайда, әзірге күн панельдерінің электр энергиясын өндіре алмай тұрғаны рас. Жапония АҚШ-пен ынтымақтаса отырып отырып, ғарышта маңызды рөл атқаруға ұмтыла бермек.

Жапониядан басқа, бұған дейін Айға ғарыш кемесін ұшырған елдер - бұрынғы Кеңес Одағы, АҚШ, Қытай және Үндістан екенін еске саламыз. Ғарыш саласындағы бұл жетістікке жапон халқы ерекше қуанып жатыр. Ел астанасы Токиода жиылған жұрт эмоцияларымен бөлісті. 

Тосиэ Ямамото, тұрғын:

- Бұған дейін сәтсіз ұшырулар сериясы болғандықтан, ерекше толқыдық. Әсіресе, жанармай таусылып қала ма деп алаңдадық. Алайда, қолымыздан келді!