Ресейлік дипломат қазақ музыкасын дәріптеп жүр

Домбырада, қобызда, сырнайда, шертерде ойнайтын ресейлік дипломат қазақтың мәдениетін дәріптеп жүр.

Дмитрий Суворов халқымыздың ұлттық музыка аспаптарында ойнауды елімізде қызмет еткен кезде меңгерген. Дипломат Ресейге оралған соң қазақ мәдениетін танытып, ағартушылық жұмыспен айналысуға кіріскен.

Ресей елшілігінің кеңесшісі Дмитрий Суворов дипломатиялық қызметін Қазақстанда атқарған кезде елімізді аралап, киелі орындарға барып, ұлттық аспаптарды меңгеруге ден қояды. Кейін танымал музыканттардан тәлім алып, таңдаулы шеберлерге аспаптар жасатады.

Дмитрий Суворов, РФ СІМ Ақпарат және баспасөз департаментінің аға кеңесшісі:
- Көрші халықтың жан дүниесін түсіну үшін оның музыкасымен танысу керек. Музыка халықтарды біріктіретін күш, өзара түсіністіктің кілті. Қазақстанда көрген бірінші аспабым добыра болды. Содан онда ойнауды үйренемін деп өзіме уәде бердім. Қазақстанда 4,5 жыл тұрдым. Осы уақыт аралығында әуелі домбыра, одан кейін қылқобыз, шертер, сазсырнай, сыбызғы ойнауды үйрендім.

Дмитрий Карелияда туып-өскен. Бір қызығы, ол музыкант емес, өздігінен білім алып үйренген. Оның әйелі Оксана кәсіби пианист. Дмитрийдің шығармашылық идеяларын қолдайды. Олар қазақ әуендерін жиі бірге орындайды. Екеуі де Қазақстанды сағынамыз дейді.

Оксана Суворова, жұбайы:
- Жұбайым аспаптарды жинай бастағанда, қай жерде сақтаймыз деп біраз ойландым. Өйткені оларды Ресейге алып келу қиын болды. Арнайы рұқсат алып, ұшақпен емес, пойызбен қайттық. Егер коллекциясы көбейе берсе, арнайы мұражай ашатын шығармыз.

Халық күйлерін үйренген Дмитрий электрдомбыраны да меңгеріп алды. Сондай-ақ ол ұлттық аспаптардың сүйемелдеуімен заманауи әндерді жаңаша өңдейді. Танымал «Домбыра» әнін орыс тіліне аударды.

Кристина Аветисова, концертті ұйымдастырушы:
- Біз Дмитрийдің орындауында қазақша әндерді жиі тындайтын болдық. Ұлттық аспаптардың дыбысы өте керемет. Мұндай концерттер мәдениетімізді байытатыны сөзсіз.

Дмитрий қазақ әндері мен күйлерін Мәскеудегі жиындарда жиі орындайды. Кештерде музыкалық аспаптардың тарихы, олармен байланысты аңыздарды әңгімелеп, достары мен көршілерін қазақ мәдениетімен таныстырып отырады.  

Авторлары: Дана Нұржан, Шахзод Гамиров