«24KZ» арнасы Ресей телевизиясы академиясының «Капитал-2024» телепремиясының арнайы сыйлығын алды
24KZ телеарнасы Бүкілресейлік «ТЕФИ-Капитал» телевизиялық сыйлығының арнайы жүлдесінің иегері атанды. Лауреаттарды марапаттау рәсімі Уфадағы Ресей мен Қазақстанның өңіраралық ынтымақтастығы форумы аясында өтті.
«ТЭФИ-Капитал» – Ресей телевизия академиясы қорының сыйлығы. Ол бизнес саласы жайлы үздік телебағдарламалар мен тележурналистердің еңбегін бағалап, құрмет көрсету мақсатында құрылған. Жеңімпаздарды Ресей Телевизия академиясының мүшелері, танымал тележүргізушілер, журналистер, экономистер және медиа индустрияның майталмандарынан құралған сарапшылар кеңесі анықтайды.
Этери Левиева, «Ресей телевизия академиясы» қорының бас директоры:
- «Хабарды» көп жылдан бері жақсы білемін. Академия Астана мен Алматыға екі рет келіп, арна жұмысымен танысқан болатын. Біз бұл оған ғашық болдық десем артық емес. Себебі ол қазіргі көрерменді қызықтыратын бағдарламалар ашып, жұмыс істей бастаған алғашқы арналардың бірі болды.
Арман Дәулетияров, Ресей телевизия академиясының мүшесі:
- Мен Ресей Телевизия академиясының мүшесімін. Қазақстандық еңбектерді көргенімде қатты қуандым. Себебі «Хабар» арнасының жұмыстары өте жоғары деңгейде. Сарапшылардың бәрі өз бағасын берді.
24KZ телеарнасының жобасы «Кәсіпкерлікті және әлеуметтік жауапкершілігі бар бизнесті тұрақты қолдағаны үшін» арнайы сыйлыққа ие болды. Сарапшылар кеңесінің жоғары бағасын алған «Басты кейіпкер» жобасында өз саласында жетістікке жеткен қазақстандықтар туралы айтылады. ТЭФИ жүлдесі «Хабар» агенттігі басқарма төрағасының бірінші орынбасары Ләззат Жүнісоваға табысталды.
Ләззат Жүнісова, «Хабар» Агенттігі» АҚ басқарма төрағасының бірінші орынбасары:
- «Басты кейіпкер» – қазақстандық кәсіпкерлер жайлы әңгімелейтін 24KZ жобаларының бірі. Бағдарламаның негізгі мақсаты – еңбек адамын насихаттау. Менің ойымша, біздің кәсіпкерлер эфирдің басты кейіпкерлері болуы керек.
Биыл «ТЭФИ-Капитал» сыйлығымен марапаттау осымен алтыншы рет ұйымдастырылып отыр. Жүлде үздік ақпараттық сюжет, деректі фильм, телеарна секілді он аталым бойынша табысталды.
Авторлары: Дана Нұржан, Шахзод Амиров