Павлодарда 200-ден астам жалған вакцинация паспорты тәркіленді

Павлодарда 200-ден астам жалған вакцинация паспорты тәркіленді
Polisia.kz

Павлодарлық полицейлер 200-ден астам жалған вакцинация паспортын тәркіледі, деп хабарлады Polisia.kz.

Жедел-іздестіру шараларын жүргізу барысында Павлодар облысының полиция қызметкерлері 2021 жылдың мамыр айында Павлодар қаласы емханаларының бірінде төрт медицина қызметкері COVID-19 вакциналарының электрондық базасына жалған мәліметтер енгізу арқылы вакцинация паспорттарын қолдан жасағанын анықтады, шара барысында 200-ден астам жалған паспорт тәркіленді.

Аталған факті бойынша ҚР ҚК 385-бабының 2-бөлімі бойынша сотқа дейінгі тергеу амалдары жүргізілуде.

Сотқа дейінгі тергеу барысында барлық тергеу-жедел шаралары жүргізіліп, қатысушылардың ұялы телефондары алынды, сондай-ақ медицина қызметкерлерінің жұмыс орны бойынша тінту шаралары жүргізілді. Нәтижесінде техникалар мен құжаттамалар тәркіленіп, тиісті сараптамалар тағайындалды.

«Қазіргі уақытта Павлодар облысының Полиция департаменті COVID-19 вакцинациясының жалған паспорттарын сатып алған және одан әрі пайдаланған адамдар тобын анықтауда. Аталған адамдарға қатысты тиісті тергеу амалдары жүргізіліп, Қазақстан Республикасы ҚК 385-бабының 3-бөлімі бойынша жалған құжатты пайдаланғаны үшін қылмыстық жауапкершілікке тарту туралы мәселе қарастырылады», – деп хабарлады Павлодар облысы Полиция департаментінің бастығы Нұрлан Мәсімов.