Қазақстандық өнертапқыш ерекше құлаққап ойлап тапты

Қазақстандық өнертапқыштар бірнеше секундта күйзелістен шығуға көмектесетін нейроқұлаққаптар ойлап тапты, деп хабарлайды «Хабар 24».

Жобаны 5 жыл бойы ғалымдармен бірлесіп зерттеген. Гаджет көпшілік назарына иннопром халықаралық көрмесінде ұсынылды.

Цифрлық медитация. Қазақстандық өнертапқыштар Иннопром халықаралық көрмесінде нейроқұлаққаптар ұсынды. Құрылғыда 10 режим бар, 6 секундтан 3 минутқа дейін уақыт аралығында адамның жүйке жүйесін тыныштандырып, тынығып алуға мүмкіндік береді.

Қанат Нұрымбеков, жоба авторы:

- Біз адамдарға күйзелістен шығуға, аз уақыт ішінде көмектесуге мүмкіндік беретін әдіс іздедік. Нәтижесінде осындай нейроқұлаққаптар ойлап таптық. Бұл гаджет мемлекеттік қызметшілерге де, медициналық мекемелерге де, тіпті барлық жерде жақсы көмектеседі.

Жобаны іске асыру үшін 5 жыл уақыт кетті. Қазір мамандар Асфендияров атындағы Ұлттық медицина университетінің базасында зерттеу жүргізіп жатыр. Әзірлеушілер гаджетті релаксация бөлмелерінде қолданылатын медициналық құрылғы ретінде ұсынуды жоспарлап отыр.

Жұлдыз Жандалеева, жоба авторы, психолог:

- Денсаулыққа әсер етпейді. Жобаны біз психология тұрғысынан ғана емес, медицина жағынан да зерттедік. Ғалымдармен бірге жұмыс істедік. Шетелден де мамандар тарттық. Біз үшін ең бастысы – адамдардың денсаулығы. Әлі де бірқатар зерттеу жүргіземіз. 

Авторлары: Әнел Еділқызы, Арман Акшабаев, Бахытбек Нуртаев.