«ХХІ ғасыр көшбасшысы»: Абай облысынан бес оқушы жолдамаға ие болды

Семейде «ХХІ ғасыр көшбасшысы» зияткерлік ойынының облыстық іріктеу туры өтті, деп хабарлайды 24KZ. Оқу-ағарту министрлігі мен «Хабар» агенттігінің бірлескен жобасы дарынды оқушыларды қолдауға бағытталған. Білім додасына Абай облысының әр түкпірінен 100-ге жуық оқушы қатысты.

Диана Болат ұлттық бірыңғай тестілеуге қызу дайындық үстінде. Елтай ауылынан келген оқушы қазақ тілі мен әдебиеті пәнін таңдаған. Болашақта ұстаз болғысы келеді.

Диана Болат, оқушы:

- Бізге, қазіргі 11-сыныптарға ең үлкен мүмкіндіктің бірі болып тұр. Жалпы бізге білім гранты беріледі, ол – біз үшін үлкен мүмкіндік. Жалпы менің қазақ тілі әдебиетін таңдау себебім өзім соған жақынмын. Өзім бала кезден әдебиетке жақынмын. Сол үшін таңдадым. Бұйырса, қазақ тілі мен әдебиеті мұғалімі боламын.

Ал Ерасыл Бақтияров дүниежүзі тарихына қызығады. Әлемде болған оқиға мен қоғамдағы жаңалықтардан үнемі хабардар. Аудандық сайыстан топ жарған ол енді республикалық додаға жолдама алуды мақсат етеді.

Ерасыл Бақтияров, оқушы:

- Негізі ағылшын мен дүниежүзі тарихы өте қызықты мен үшін және де бүкіл әлем мен үшін қызықты. Аудандық олимпиададағы сұрақтардың көбі сол дүниежүзі тарихы, барлық әлем бойынша өте қызықты фактілер, өзіме ұнайтын тақырыптар келген соң мен үшін өте оңай және қызықты болды.

«ХХІ ғасыр көшбасшысы» ойынына қатысушылар бұған дейін түрлі байқауларда, олимпиадалар мен шығармашылық сайыстарда үздік атанған. 11-сынып оқушылары облыстық кезеңде 60 сұраққа жауап береді. Бұған 1 сағат 15 минут қарастырылған. 

Әлия Қайырлыбекқызы, биология пәнінің мұғалімі:

- Ең бірінші бұл көшбасшыға келген оқушы – ол қорықпайтын оқушы. Өзіне деген сенімі мол. Егер де сенімділік болмаса, оқушы бұл сайысқа келмес еді. Яғни, бұл 11-сыныпты бітіргелі отырған әрбір оқушыға мүмкіндік деп ойлаймын. Білімі бар оқушы кез келген жерден ойып орын алады деп ойлаймын.

Мейрамгүл Жанасбаева, облыстық Дарын орталығы директорының орынбасары:

- Негізі мақсаты мен міндеті – интеллектуалды қабілеті жоғары балаларды анықтау және қолдау көрсету. Облыстық кезеңі өтіп жатыр. Аудандық кезеңінен өткен 100-ге жуық бала бүгін қатысып жатыр. Әр ауданнан келіп отыр.

«ХХІ ғасыр көшбасшысы» зияткерлік ойынының облыстық кезең қорытындысы бойынша 5 жеңімпаз анықталды. Енді олар Абай облысының намысын республикалық деңгейде қорғайды.

Авторлары: Рүстем Қайратұлы, Медет Өмірханов.