Елде 896 медицина қызметкері «Болашақ» бағдарламасымен оқып келген

Елде 896  медицина қызметкері «Болашақ» бағдарламасымен шетелде оқып келді.

Оның 382-сі дәрігер. Әлемнің жетекші медициналық жоғары оқу орнында тәлім алғандар, бүгінде барлық өңірде еңбек етіп жүр. Халықаралық тағылымдамадан өткен ақ халатты мамандар аса күрделі операцияларды жасайды. Солардың бірі Абылайхан Дусеков. Ол Ақтаудағы «Нейрон» емханасында, отоларинголог дәрігер қызметін атқарады.

Абылайхан Дусеков «Болашақ» бағдарламасымен Ұлыбритания, Шотландияда оқыған. Тәлімі мол тәжірибелі маман заманауи медициналық технологияны қолдана отырып құлақ, мұрын және тамақ ауруларын емдейді. Ол Маңғыстау тарихында адамның есту мүшесіне эндоскопиялық тәсілмен операция жасаған алғашқы отоларинголог-дәрігер.

Абылайхан Дусеков, отоларинголог:

- Тимпанопластика деген операция бар. Дабыл жарғағы тесігінің бітелуі. Соны эндоскопиялық жолмен, яғни құлақтың артында үлкен тілік болмайды. Тек құлақтың өзінің тесігі арқылы жасалатын операция. Бұл операция әлемде бірнеше жылдан бері практикада. Науқастың реабилитациялық кезеңі тез болады, есту қабілеті жақсарады. 

Ақтаулық дәрігерге өңірлерден жоспарлы түрде емдеуге жатқызу порталы арқылы науқастар келіп қаралады. Жанар Әлниязоваға күні кеше күрделі операция жасалып, сәтті аяқталды. Ақтөбе қаласының  тұрғыны жаңа жылға дейін жақындарына оралатынын естіп, қуанышты.

Жанар Алниязова, Ақтөбе қаласының тұрғыны:

- Астанадағы дәрігердің кеңесімен келдім, осы врач жақсы деді. Жас болғасын қорқасың ғой, отзывтарын қарадым. Бәрі жақсы, өзіме ұнады. Жасаған операцияларын қарадым. Әлі де алда алатын емдерім бар жасалатын, сол уақытта осы жаққа боламын әзірге.

«Болашақ» бағдарламасы АҚШ, Германия, Жапаония, Қытай сынды әлемнің 30-дан астам елінің 273 жетекші оқу орындарымен әріптестік байланыста. Жалпы алғанда 31 жылда 12 мыңнан астам отандасымыз шетелде оқыды. 773 адам ғылыми тәжірибеден өтті. Білім, құқықтану, инженерлік ғылымдар секілді жүзден астам салада білім алған жастар бүгінде елдің дамуына өз үлесін қосып келеді.

Талғат Исламұлы, Саламат Бекбаев