Өрт болған аймақтағы халық үйіне орала бастады

Абай облысында қарағайлы ормандағы өртті сөндіру әлі де жалғасып келеді.

Құтқарушылар төртінші күн қатарынан күн-түн демей жұмыс істеп жатыр. Ал осыдан бірнеше күн бұрын эвакуацияланған тұрғындар үйлеріне орала бастады.

Азамат Қасым, тілші:

- Сөзімді жақсы жаңалықтан бастағым келеді. Осыдан бірнеше күн бұрын үйлерін тастап үдере көшкен тұрғындар шаңырақтарына орала бастады. Кеше Семейдегі екі жатақханаға қалаға таяу үш ауылдан 51 адам орналастырылған болатын. Жаңа ғана төтенше жағдайды жою жөніндегі штаб өкілдерімен сөйлескенімізде тұрғындарды әкетуге автобустардың шыққанын айтты. 

Сонда елді мекендерге қауіп төніп тұрған жоқ деуге бола ма?   

- Әзірге солай деуге болады. Кеше жедел штаб өкілдері де осыны айтты. Дегенмен, тілсіз жаудың аты тілсіз жау екенін естен шығармаған дұрыс шығар.

Қазір Бородулиха ауданындағы Поднебесное, Барышовка және Успен ауылының тұрғындары үйлеріне келіп жатыр. Жаңа ғана біз ауылға кіріп, елді мекеннің бір тұрғынымен сөйлескен едік.

Назым Оспанова, Успен ауылының тұрғыны:

- Бәріне рахмет. Өрт сөндірушілерге рахмет. Қаншама қайғы болып жатыр. Қаншама адам қайтыс болды. Танитын адамдар. Лесхоздың бастығы, Саят деген жігіт. Лесхоздың бастығы жап-жас келіншек. Апай, апай деп тұратын. Сүп-сүйкімді, өңді келіншек болған. Өңді. Қимайсың өлімге.   

Расында, өрттен ең көп зардап шеккен осы ауыл. Қайтыс болғандардың жартысына жуығы осы Успен ауылының тұрғындары. Тілсіз жаудан өмірімен қош айтысқан жандардың ең жасы 25 жаста.

Ең үлкені 63 жаста. Ал өрттен көз жұмған жалғыз әйел Мейрамгүл Жиенбаева 34 жаста. Соңында екі баласы қалды.

- Қазір ауа райы қалай болып тұр? Оқиға орнында қанша адам жұмыс істеп жатыр?

Азамат Қасым, тілші:

Дәл қазір жел соғып тұр. Бірақ күн салқындау. Қазір бес учаскеде өрт сөндіру жалғасуда. Оқиға орнында

1500 адам, 300-ге жуық техника, 10 шақты тікұшақ жұмыс істеп жатыр. Өздеріңіз көріп тұрғандай, әр жерде бірнеше далалық ас үйлер жұмыс істеп тұр. Өрт бастағалы бері жергілікті әкімдік пен еріктілер 1 тоннадан астам ауыз су, 3 жарым тонна ұн, 500 келі қант жеткізіпті.