Алматылық ардагерлер генерал Сағадат Нұрмағамбетовті еске алды
Сағадат Нұрмағамбетовтің 100 жылдық торқалы тойы республика көлемінде аталып өтуде, деп хабарлайды 24KZ.
Алматылық ардагерлер Кеңес Одағының батыры тұрған үйдің қабырғасындағы ескерткіш тақтаға гүл қойды. Армия генералының соғыс жылдарындағы ерліктері мен еліміздің Қарулы күштерін дамытуға қосқан орасан еңбегін еске алды. 28 гвардияшы-панфиловшылар саябағындағы мәңгілік алауда ардагерлер мен сарбаздар батыр рухына тағзым етті.
Махмұт Телегусов, «Генералдар кеңесі» республикалық қоғамдық бірлестігі президиумының төрағасы:
- Біріншіден, Сағадат Нұрмағамбетовтің әскери шеберлігі, кемеңгерлігі мен іскерлігі кез келген әскери қызметшіге үлгі. Отанға деген құрметі мен махаббаты тәуелсіз еліміздің бүгінгі қарулы қуатынан көрінеді. Ол әр өңірден әскери қызметке лайықты жігіттерді жинап, отансүйгіштікке баулыды. Қазіргі генералдардың көбі Сағадат Нұрмағамбетовтің шәкірті.