Ақтөбе облысында коронавирусқа шалдыққандар саны бәсеңдегенімен ауруханаға ауыр жағдайда түсушілердің қатары азаймай отыр.
Бүгінде 84 науқас реанимациялық бөлімшелерде ем алуда. Оның ішінде 15-і өкпені жасанды желдету аппаратына қосылған. Дәрігерлердің жіті бақылауына алынғандардың арасында жүкті әйелдер мен балалар да бар. Ал қыркүйек басталғалы 500-ге жуық мектеп оқушысынан коронавирус белгісі анықталды. Қазір олардың 260-тан астамының денсаулығы қадағалауға алынған. Мамандар соңғы бір айдағы көрсеткішпен салыстырғанда індет жұқтырушылар қатары азайғанымен арқаны кеңге салуға ерте екенін ескертіп отыр.
Гүлбану Дәулетова, облыстық санитарлық-эпидемиологиялық бақылау департаменті басшысының міндетін атқарушы:
- Бүгінгі таңда мектеп оқушылары арасында 489 жағдай тіркеліп отыр. Қазіргі таңда 123 мектепте 473 сынып қашықтан оқу форматына көшірілді.