Жарылған дәріханаға көршілес үйлердің тұрғындары баспанасында түнеуге қорқып жүр

Шымкентте жарылыс болған аумақ тазартылып жатыр. Мұнда көп қабатты тұрғын үй мен перзентхана зақымданып, 11 автокөлік жарамсыз болып қалған. Ал үш адамның өмірін қиған жарылыстың себеп салдары әлі белгісіз.

Жарылыс болған күні Шымкенттегі, облысқа қарасты клиникалық ауруханаға бес адам жедел түрде жеткізілді. Оның бірі ауыр дене жарақатын алып, операциядан соң жан тапсырды. Бүгін тағы бір науқастың жақ сүйегіне операция жасалды. Дәрігерлер науқастардың жағдайы тұрақталып, психологиялық көмек көрсетіліп жатқанын айтады. 

Сұлтанбек Мұсаев, облыстық клиникалық аурухананың ортопед-травматолог дәрігері:

- Қазір төртеу. Ортопедияда үшеу, тағы бір жағы сынып жатыр. Көбінесе денелерінде шыны қалдықтары бар. Гематомалары бар. Бір науқастың миы шайқалған, реанимациядан шықты. Бір қалыпты дұрыс.

Ал екі күннен бері қирандыға айналған аумақты үйінділерден тазарту жұмыстары жүріп жатыр. Төңіректі жайпаған жарылыс, жапсарлас орналасқан облыстық перзентхана мен көп қабатты үйге зақым келтірген. 

Нұрсұлтан Мұхамеджан, тілші:

- Жойқын жарылыс салдарынан дәріханаға көрші орналасқан бес қабатты тұрғын үйге де зақым келді. Жарылыс толқынының қуатты болғаны соншалық кірпіштерді шашып, терезелерді шағып қоймай, бетон тіреулерді де ұшырып жіберген. 

Асқан жылдамдықпен ұшқан бетон тіреуіш баспананың балконын қиратты. Ал қиыршық тастар үй терезесін сындырып, қабырғаны тесіп тастаған. Абырой болғанда, жарылыс уақытында үйде ешкім болмапты. Енді бүлінген жиһаз бен техниканың санын арнайы құрылған комиссия анықтап жатыр. Құрамында тұрғын үйдің иесі де бар. 

Олжас Қонысов, қала тұрғыны:

- Көбісі қорқып қалған. 5 қабаттың тұрғындары өз үйлерінде тұра алмайды. Басқа жақта тұруға мәжбүр болып тұр. Үйді жөндеп берсе, алдында тұрған состояниеге келтіріп берсе деп талап етеміз. 

Александра Литвинова, қала тұрғыны:

- Біздің пәтерде тұру қауіпті. Өйткені бетон плитасында жарықшақ пайда болды. Ол кез келген уақытта опырылып түсуі мүмкін. Ал көршілеріміздің үйлеріндегі қабырғалар құлаудың аз-ақ алдында тұр. Сондықтан көбі туысы мен достарының үйін паналап жүр. Ал басқа баратын жері жоқ адамдар қауіпті болса да өз үйінде қалды.

Үй маңында үйіндіге айналған жаралыстың қалдығын тазартуға қажетті техника күші жұмылдырылған. Екі қабатты дәріхананың зертхана аумағында болған жарылысқа кімнің кінәлі екенін құзырлы органдар анықтап жатыр. Қылмыстық іс ашылып, сотқа дейінге тергеу жүріп жатыр. Еңбекші аудандық әкімдігі де әзірге материалдық шығынды кімнің өтейтіні содан кейін ғана белгілі болады, дейді. 

Александр Малахов, Еңбекші ауданы әкімінің орынбасары:

- Бүлінген шатырды бөлшектеп қайта қалпына келтіруге тырысып жатырмыз. Бүгін тұрғындармен бірге пәтірлерді аралап, шығын көлемін есептеуге кірістік. Осылайша ақау актісін жасап, зақым келген мүлікке санақ жүргіземіз. Одан кейін кінәлілер анықталса соның есебінен шығын өтеледі.

Бүгінде аталған жағдайға байланысты арнайы комиссия құрылды. Ал №1 облыстық перинаталдық орталықтың жұмысын қашан жалғастыратыны тексеру жұмыстары аяқталғанан кейін белгілі болады.

Нұрсұлтан Мұхамеджан, Самат Нағашбекұлы, Нұрмахан Бекмұратов