Алматы фристайлдан әлем чемпионатын қабылдайды
Алматы қаласы фристайлдан әлем чемпионатын қабылдайды, деп хабарлайды 24kz.
Фристайл-могул және фристайл-акробатикадан жасөспірімдер арасындағы жарыс ертең басталады. Дүниежүзілік дода қатысушылары қазір «Шымбұлақ» шаңғы базасында соңғы дайындықты пысықтап жатыр.
Байрақты бәсекеге еліміз атынан 10 спортшы қатысады. Әлем чемпионатының өзі 4 күнге созылады және жалпы қорытындысы 11 қаңтарда белгілі болады.
Аслан Қаженов, тілші:
- Біріккен Араб Әмірліктерінің Фуджейра қаласында семсерлесуден жасөспірімдер арасындағы дүниежүзілік дода жалғасып жатыр. Жарыстың алғашқы күндері қазақстандық София Ақтаева рапира бағыты бойынша ең үздік нәтиже тіркеп, алтын жүлде жеңіп алған болатын. Дәл осы София бастаған қыздар енді командалық сында үздік үштікке ілікті.
Қазақстан атынан София Ақтаевдан бөлек Алена Гноева, Алина Ескендірова және Алуа Нұрқанова жарысқа араласқан болатын. Олар қола жүлде үшін Чехия құрамасымен кездесіп, 45:31 есебмен жеңіске жетті. Бұған қоса, жасөспірім ұлдар арасындағы бәсеке паралель Швейцарияның Базель қаласында өтіп жатыр. Бұнда да ұлттық құрама жеңіс тұғырына көтерілді. Шпагамен семсерлесудің командалық сынында Қазақстан құрамасы күміс жүлдегер атанды. Жерлестеріміз финалға дейін жетіп, ақтық сында Мысыр спортшыларына ғана есе жіберді. Ел намысын Богдан Лукин, Кирилл Проходов, Нұржан Әбжанов және Георгий Тинников төрттігі қорғады.
Шахматтан әлемдік рейтинг жаңарды
Бибісара 6-шы, Мерует 3-ші орында. Халықаралық шахмат федерациясы соңғы жарыстарды саралап, әлемдік рейтингті жаңартты. Оған сәйкес, әйелдер арасында бірнеше спортшымыз үздіктер қатарына ілікті. Ең жоғары көрсеткіш Бибісара Асаубаеваға тиесілі. Ол блиц бағыты бойынша әлемдік рейтингтің 6-шы, ал, рапид бағыты бойынша 9-шы сатысына жайғасты.
Жасөспірімдер арасында тағы бір қазақ қызы Меруерт Қамалиденованың көрсеткіштері жақсы. Ол блиц бағыты бойынша алдыңғы үштікті түйіндеп тұр. Рапид бойынша 4-ші орында. Бұған қоса, үздіктер қатарынан Алуа Нұрман, Әмина Қайырбекова, Зарина Нұрғалиева, Ксения Балабаева және Елназ Калиахмет сияқты қазақстандық спортшыларды кезедстіруге болады.
Айта кетейік, былтыр Халықаралық шахмат федерациясы мен Азия шахмат федерациясы ұйымдастырған ресми жарыста Қазақстандық спортшылар 160 медаль жеңіп алды. Оның 55-і алтын. Бұл отандық спорт үшін, әсіресе, отандық шахмат үшін бұрын-соңды болмаған рекордтық көрсеткіш саналады.
Д.Елеусінов: Биыл үш кездесу өткізгім келеді
Данияр Елеусінов биыл 3 кездесу өткізгісі келеді. Бұл жөнінде Қазақстандық кәсіпқой боксшы Sportnews.kz порталына берген сұхбатында мәлімдеді.
Айта кетейік, Данияр ұзақ уақыт шарша алаңға шықпаған болатын. Яғни, соңғы рет 2023 жылдың желтоқсан айында жұдырықтасты. Астанадағы «Чемпиондар түні» турнирінде Оңтүстік Африка Республикасының спортшысын жеңді.
Енді үлкен паузадан кейін алдағы ақпан айында қайтадан рингке оралмақ. Нақтырақ айтқанда, 28 ақпан күні Астанада өтетін бокс кешіне қатысады және Даниярдың кездесуі басты жекпе-жек болмақ. Бірақ әзірге қарсыласы белгісіз. «Бірнеше боксшы Қазақстанға келуден бас тартты. Неге екенін білмеймін. Біз барынша бәсекесі жоғары және көрермендерге қызықты жекпе-жек жасағымыз келеді. Қазір басқа былғары қолғап шеберлерінен хабар күтіп отырмыз. Биыл бас-аяғы 3 кездесу өткізгім келеді», - деді Данияр.
Айта кетейік, Данияр Елеусінов жалпы алғанда бүгінге дейін кәсіпқой рингте 12 кездесу өтізіп, 12-сінде де жеңіске жетті. Оның 7-еуін уақытынан бұрын аяқтады. Осының арқасында BoxRec рейтингінде алдыңғы 15 боксшының қатарына қосылды.