424,44 504.55 5.80
+7 (7172) 757 485 24kz@khabar.kz
ҚАЗ

Ауылдық округ бюджеттері салықтың жаңа төрт түрінен түсетін түсімдер есебінен ұлғайтылмақ

  • 214
  • UPD: 13:05, 03.02.2021
Ауылдық округ бюджеттері салықтың жаңа төрт түрінен түсетін түсімдер есебінен ұлғайтылмақ parlam.kz

Бүгін Мәжіліс спикері Нұрлан Нығматулиннің төрағалығымен өткен жалпы отырыста депутаттар аудандық, қалалық және ауылдық билік деңгейлерінің дербестігі мен жауапкершілігін кеңейту мәселелеріне қатысты заң жобасын бірінші оқылымда мақұлдады.

Жаңа заң жобасына сәйкес, енді ауылдық округтердің бюджеттері салықтардың жаңа төрт түрінен түсетін түсімдер есебінен ұлғайтылатын болады, деп хабарлайды Мәжілістің баспасөз қызметі.

Мәжіліс төрағасы Нұрлан Нығматулин атап өткендей, бұл жергілікті бюджеттердің дербестігін дамытудың жаңа кезеңі, ол ауылдың әлеуметтік мәселелерін жедел шешуге мүмкіндік береді.

Сонымен қатар Нұрлан Нығматулин бюджет қаражатын тиімді әкімшілендірудің маңыздылығын және әкімдерді дайындау деңгейінің қажеттігін  атап өтті.

Айта кету керек, 2018 жылы қабылданған Жергілікті өзін-өзі басқару туралы заңға сәйкес, бөлінген қаражат бірінші кезекте қайда жұмсалатындығы ауыл тұрғындарының жиналысында анықталатын. Ал жаңа заң жобасы бойынша әкім аппаратына өз бюджеттерін 20%-тен аспайтын мөлшерде түзетуге мүмкіндік беріледі, бюджетті рәсімдері бекіту оңайлатылады, сондай-ақ меншікті түсімдер көлемінің 10%-тен аспайтын мөлшерде ауылдық бюджет резервін құру көзделеді.

Сондай-ақ заң жобасында мәслихаттар депутаттарына қосымша құқықтар мен міндеттер беру және мәслихаттар хатшыларының құқықтық мәртебесін арттыру ұсынылады.

Хабар 24 телеарнасы