426,61 518.00 5.87
+7 (7172) 757 485 24kz@khabar.kz
ҚАЗ

Олжас Сүлейменовке ҚР Президенті мен Елбасының құттықтау хаттары табысталды

  • 256
  • UPD: 22:59, 21.05.2021

Қазақстан Республикасының Мемлекеттік хатшысы Қырымбек Көшербаев қоғам қайраткері, жазушы Олжас Сүлейменовті 85 жылдық мерейтойымен құттықтады. Алматыда өткен кездесуде Мемлекеттік хатшы ақынға Елбасы Нұрсұлтан Назарбаев пен Мемлекет басшысы Қасым-Жомарт Тоқаевтың құттықтау хаттарын табыстады.

Тектің тегін емес екенін біздің ұлтымыз жақсы біледі. Тарихқа үңілсек, Абылай ханның жанында жүрген жаужүрек қолбасшысы Олжабай батыр «арманда кетіп барамын, бірақ менің арманым жетінші ұрпағымда бір қайталанады, бір әулетім өзім тәрізді батыр және асқан жырау болады» деп әулиелік сөз айтқан екен. Олжас Сүлейменов сол Олжабай батырдың ұрпағы. Мемлекеттік хатшы Қырымбек Көшербаев тарихтан қалған тәмсілдің шындыққа айналғанын тілге тиек етті.

Қырымбек Көшербаев, ҚР Мемлекеттік хатшысы:

- Сол сәуегейлік сөздің бүгін сәулелі жырға айналғанына біз ғана емес, бүкіл әлем көз жеткізіп жатыр. Сондықтан барша қазақ қазіргі таңда көріпкел бабасының атын алып, арманын орындаған, Зейнолла Қабдолов ағамыздың сөзімен Олжас Омарұлын мақтамайды, Олжас Омарұлымен мақтанады.

«Достық үйінде» өткен мерейтойлық шараға жиналғандар Олжас Сүлейменовтің өмір жолына үңіліп, кемел жасқа келген кемеңгер тұлғаның шығармашылығы мен қайраткерлігін келер ұрпаққа үлгі етті. Ақынның сонау 1975 жылы жарық көрген «Аз и Я» кітабінің құндылығы әлі де жоғары екенін атап өтті.  

Қырымбек Көшербаев, ҚР Мемлекеттік хатшысы:

- Бұрын-соңды түрен түспеген түркі-славян этно-тарихи кеңістігінің ортақтығын тақырып етіп алды. Ұлы дала мен русьтің, қала берді Еуразия құрлығының рухани мәдени тұтастығын тұнық жырымен, тұшымды зерттеулерімен айқындап берді. 

«Олжас Сүлейменов ұлт тағдырына бей-жай қарамаған қарымды қаламгер» дейді үзеңгілестері. Оның белсенділігінің арқасында Семей ядролық полигоны жұмысын тоқтатты.

«1926 жылғы санақ бойынша қазақтар Кеңес Одағындағы түркітілдес ұлттардың ішіндегі ең көбі – 6 миллион 200 мың адам болған. Ал 1939 жылы 2 миллиондай ғана қалған. Аз ұлт атану «бақыты» үшін осынша құн төлеген басқа қандай ұлт бар екен?!» деп ашына жазған Олжан Омарұлы қалам ұстаған жанның жауапкершілігін тағы бір еске салды.

Олжас Сүлейменов, мемлекет және қоғам қайраткері, Қазақстанның Еңбек Ері:

- Әр жазушының, әр ақынның немесе өнер адамының ортақ міндеті өз оқырманы мен тыңдарманының бойына ізгілікті егу, талантын ояту, адамгершілікті сіңіру. Осы арқылы әр адам өз ұлтының нағыз жанашырына айналады. Өз халқы үшін еңбек ететін болады.

Мерейтой иесіне Қазақстанның Еңбек Ері, халық артисі Асанәлі Әшімов, академик Төрегелді Шарманов, Халықаралық Түркі Академиясының президенті Дархан Қыдырәлі өздерінің жылы лебіздері мен тілектерін білдірді.

Авторлар: Гүлжан Көланқызы, Нұрдәулет Жақсыбаев

Хабар 24 телеарнасы