Ел Тәуелсіздігінің 30 жылдығына арналған дәстүрлі айдарымызды жалғастырамыз. Бүгін 2004 және 2006 жылдар аралығында болған елеулі оқиғаларды еске түсірелік. 2004 жылы елордада Қазақстан Республикасы Тұңғыш Президентінің Музейі ашылды. Бүгінгі таңда онда 100 мыңнан астам экспонат бар. Дәл осы жылы Қазақстан Республикасының Президенті Нұрсұлтан Назарбаевтың Жарлығымен «Мәдени мұра» мемлекеттік Бағдарламасы қабылданып, тарихи жәдгірлер түгенделе бастады. Астана декларациясы Ал 2005 жылдың 5 шілдесінде елордада өткен Мемлекет басшыларының саммитінде Астана декларациясына қол қойылды. Сөйтіп, ШЫҰ-ға мүше мемлекеттердің терроризмге, сепаратизм мен экстремизмге қарсы күрестегі ынтымақтастық тұжырымдамасы мен ережесі бекітілді. Бұл ұйымның лаңкестікке қарсы сипаттағы негізгі құжаттары саналады. Жаңа әнұран 2006 жылдың қаңтарында республиканың жаңа әнұраны қабылданды. Ел гимніне композитор Шәмші Қалдаяқовтың 1950 жылдары жазылған «Менің Қазақстаным» әні негіз болды. Әннің сөзін жазған Жұмекен Нәжімеденовтың мәтініне Елбасы Нұрсұлтан Назарбаев өзгеріс енгізіп, жаңа әнұранның заңды авторларының бірі болды.