Ұлыбритания үкіметін Борис Джонсоннан кейін Лиз Трасс басқаратын болды. Оның кандидатурасын Консервативтік партия мүшелерінің көпшілігі қолдап, дауыс берді. 47 жастағы Трасс салықты азайтуға, энергетикалық дағдарыспен күресуге уәде береді және Украинадағы соғысты тоқататуға күш салмақ. Ғалымжан Қараманұлы, тілші: - Депутаттардың 57 проценті Лиз Трассты қолдап дауыс берген. Трасс Денсаулық сақтау салығы мен корпоративті салық көлемін өсірмеуге ниетті. Бірақ салдарынан, Ұлыбритания бюджеті миллиардтаған төлемдерден айырылуы мүмкін. Десе де ол билік партиясы мүшелерінің алдында сөйлеген сөзінде өз күшіне сенімді екенін жеткізді. Лиз Трасс, Ұлыбритания премьер-министрі: - Мен ковид пандемиясынан кейін Ұлыбритания экономикасын нығайтуды көздейтін және салықты азайтуға бағытталған “батыл жоспар” ұсынамын. Сондай-ақ энергетикалық дағдарысты және денсаулық сақтау саласындағы проблемаларды шешу үшін әрекет етемін. Біз жетістікке жетеміз және 2024 жылы Консервативті партияның жалпыұлттық сайлауда жеңіс тұғырынан көрінуіне атсалысамыз. Лиз Трасстың Ұлыбритания тарихында үкімет басқарған алғашқы әйел - Маргарет Тэтчерге ұқсағысы келетінін анық аңғаруға болады. Ол баяндамалары мен мақалаларында өзін жаңа “Темір ханым” кейпінде көрсетуге тырысып бағуда. Бұған дейін 2016-2019 жылдары билікте отырған Тереза Мэй де Тэтчердің жолын қууға тырысып еді - болмады. Қалай болғанда да Даунинг стритке келетін жаңа премьердің шешуі тиіс проблемалар шаш-етек. Джон Кампфнер, “Әлемдегі Ұлыбритания” бастамасының атқарушы директоры: - Экономикалық майданда инфляция деңгейі 10 проценттен асып түсті. Теміржолшылар, пошташылар, заңгерлер, тіпті қоқыс жинаушылар күн сайын ереуілге шығып жатыр. Алда үлкен әлеуметтік толқулар болуы мүмкін, өйткені электр энергиясы мен газ бағасы 200 пайызға өсті және тоқсан сайын ұлғая бермек. Лиз Трасс білікті саясаткер, қызмет жолында икемділік, прагматизм, түйсік сияқты жеке қасиеттерін көрсете білді. Бірақ сарапшылар ол принципсіздік және флюгер ұғымдарымен де пара-пар дейді. Мәселен, Трасс еуропашыл Дэвид Кэмерон билікте отырған кезде Еуроодақты, ал Борис Джонсон басшылыққа келгенде Брекситті қолдағаны белгілі. Қазір Трасс билік партиясы мүшелерінің көңілінен шығып отыр. Бірақ алда өтетін жалпыұлттық парламенттік сайлауда халық қолдауын иеленіп, партияны жеңіске жетелей ала ма? Бұл уақыт еншісіндегі мәселе. Ғалымжан Қараманұлы