Батыс Қазақстан облысында «Қазпошта» мекемесінің қызметкерлері аталған акционерлік қоғамға тиесілі 33 миллион теңгені жымқырған.
Олар жергілікті серіктестіктердің бірінің аударған қаржысын өздеріне еншілеп отырған. Қазір Қазақстан Республикасы Қылмыстық Кодексінің 189-ыншы бабы бойынша қылмыстық іс қозғалған. Бұдан басқа пошта қызметкерлерінің зейнеткерлердің 7 млн теңгесін алдап иемденіп кеткені әшкереленді.
Мерей Мұратбеков, БҚО Экономикалық тергеу департаментінің басқарма бастығы:
– БҚО екі тұрғыны осы қылмыстық құқық бұзушылықты жасады деген күдікпен ұсталып, ҚР ҚІЖК 128-бабы негізінде Орал қаласы уақытша ұстау изоляторына қамалды. Қазір тергеу амалдары жүргізілуде. Тергеу мүддесі үшін басқа да ақпараттар қосымша жарияланатын болады.