Алматыдағы Шәріпов пен Гоголь көшесінің қиылысында жарылған жылу магистралі қалпына келтірілді. Бұл туралы қаланың Энергетика және сумен жабдықтау басқармасы хабарлады.
Құбырды жөндеу жұмыстары 11 қарашаға қараған түні сағат 02:00-ге таман аяқталған. Кейін сынақ жүргізіліп, жылу берілді. Сондай-ақ Шәріпов көшесіндегі көлік қозғалысы қалпына келтірілді. Асфальттың жабындысын ауа райына байланысты 13 қарашаға дейін ретке келтіру жоспарланған. Естеріңізге сала кетейік, диаметрі 400 мм жылу магистралі кеше кешкі 17:00-ге қарай жарылған болатын. Апатқа құбырдың ескілігі себеп болған.