476,27 474,60 7,83
+7 (7172) 757 485 24kz@khabar.kz

Қ.Тоқаев Г.Бердімұхамедовті «Алтын Қыран» орденімен марапаттады

  • 240
  • UPD: 19:55, 29.06.2022
Қ.Тоқаев Г.Бердімұхамедовті «Алтын Қыран» орденімен марапаттады

Мемлекет басшысы Ашхабадқа барды. Қасым-Жомарт Тоқаев Түрікмен астанасында өткен Каспий маңы елдері басшыларының алтыншы саммитіне қатысты.

Алқалы жиынға дейін Қасым-Жомарт Тоқаев елдің бұрынғы президенті Гурбангулы Бердімұхамедовпен және қазіргі түрікмен басшысы Сердар Бердімұхамедовпен кездесті. Түрікменстан Ұлттық кеңесі Халық мәслихатының төрағасы Гурбангулы Бердімұхамедов елді 15 жылдай басқарып, биылғы көктемде президенттіктен кеткен еді. Бүгін 65 жасқа толып отыр. Қасым-Жомарт Тоқаев Бердімұхамедовты мерейтойымен құттықтап, еңбегін атап өтті.

Қасым-Жомарт Тоқаев Қазақстан Республикасының Президенті:

- Құрметті Гурбангулы Мяликгулевич, сізді Қазақстан жұрты мемлекет қайраткері деп біледі. Елдеріміз арасындағы достық қарым-қатынасты жоғары деңгейге көтеруге зор үлес қостыңыз. Дипломатиялық қарым-қатынастарымыздың орнағанына 30 жыл. Сауда-экономикалық және мәдени-гуманитарлық салалар қарқынды дамып келеді. Мұнда сіздің еңбегіңіз орасан. 

Қазақ пен түрікмен ертеден бауыр. Бауырластық бүгінде стратегиялық серіктестік деңгейіне жетті. Тараптар екі ел арасындағы сауда-экономикалық, мәдени-гуманитарлық қатынастардың қарқынды дамып келе жатқанын атап өтті. Былтыр Түрікменстанға барғанда қазақ басшысына Аркадаг ақалтекені сыйға тартқан еді. Бүгін Қасым-Жомарт Тоқаев қарымта құрмет көрсетті. Қазақ-түрікмен қарым-қатынасына қосқан өлшеусіз үлесі үшін Гурбангулы Бердімұхамедовті елімізді жоғары мемлекеттік наградасы «Алтын Қыран» орденімен марапаттады. 

Кейін Мемлекет басшысы әкесінің орнына келген Сердар Бердімұхамедовпен кездесті. Қасым-Жомарт Тоқаев Түрікменстан Президентіне қонақжайлығы үшін ризашылығын білдірді. Сердар Бердімұхамедов Президент болғалы Қасым-Жомарт Тоқаевпен алғаш бетпе-бет кездесіп отыр. Мемлекет басшысы Түрікменстанның жаңа Президентін сайлаудағы жеңісімен құттықтады. Кіші Бердімұхамедов Қасым-Жомарт Тоқаевқа шақыруын қабыл алғаны үшін ризашылығын білдіріп, алтыншы саммиттің берері мол екенін атап өтті.

Хабар 24 телеарнасы