Алматы облысындағы Ұзынағаш ауылында 3 ауысымды мектеп мәселесі өзекті болып тұр. Ауылда алты мектеп бар. Бірақ, бала саны көп болғандықтан, төрт мектеп үш ауысымда жұмыс істейді. Мысалы, Тұрар Рысқұлов атындағы орта мектепте 2 мың 200-ден астам оқушы білім алады. Оқушылардың тең жартысы түстен кейін оқуға мәжбүр. Жалпы Жамбыл ауданындағы 62 мектепте 36 мың 100 бала білім алады. Өңірге сырттан көшіп келушілер көп. Ішкі миграция және бар. Былтыр бірінші сыныпқа мың жарым бала барған. Сондықтан жаңа мектептер керек. «Ұзынағашта 1 мың 500 орындық жаңа мектеп құрылысы биыл бітсе, басқа мектептердің жүктемесі едәуір жеңілдейді», - дейді білім саласына жауаптылар. Светлана Алтынбекова, Жамбыл аудандық білім бөлімінің басшысы: - Ол мектептің құрылысы аяқталып, бізде Ұзынағаштағы Бердіқұлов, Рысқұловтың оқушылары сол мектепке ауысатын болады. Сол кезде осы мектептен үш ауысымдық мәселесі шешіледі.