Канадада құтқарушылар су тасқыны мен лай көшкінінен Британдық Колумбия провинциясында қамалып қалған 18 мың тұрғынға жете алмай жатыр.
Ақпарат көздері табиғат апатынан 1 адам қаза тапқанын хабарлайды. Тағы 4 тұрғын із-түзсіз жоғалғандардың қатарында. Жергілікті билік мерт болғандардың саны әлі де артуы мүмкін дейді. Көшкін елдің ең ірі порты Ванкуверге апарар жолды да бұғаттап тастаған. Британдық Колумбия провинциясының премьер-министрі Джон Хорган аймақта төтенше жағдай режимін жариялады. Ал Оттава билігі апаттан зардап шеккен өңірге қосымша әскери әуе күштерін жөнелтетінін хабарлады.