Тәжікстанда парламент сайлауында дауыс беру аяқталды

Сайлау учаскелері жергілікті уақытпен тура сағат 20:00-де жабылды.

Тәжікстанның сайлау және референдум жөніндегі орталық комиссиясының басшысы Бахтиёр Худоёрзоданың айтуынша, сайлау ашық және демократиялы жолмен өтті.

«Сайлау әділ өтті. Комиссияға күні бойы ешқандай арыз-шағым түскен жоқ», - дейді Б.Худоёрзода.

Мұның алдында комиссия жетекшісі сайлау барлық талапқа сай өтті деп танылғанын атап өткен еді. Өйткені сайлаушылардың қатысу көрсеткіші белгіленген 50 пайыздан жоғары болды.

«Күндізгі 15:00-ге дейін бүкіл елде 3 млн 703 мың 969 адам дауыс беріп үлгерді. Бұл елдегі бүкіл сайлаушылардың 75,1 пайызы», - дейді Бахтиёр Худоёрзода.

Қазіргі уақытта комиссия дауыс санауға кірісіп кетті. Сайлаудың алдын ала қорытындысы 2 наурызда жарияланады. Парламент сайлауының түпкілікті қорытындысы екі апта ішінде белгілі болады.